विराटनगर । नेपाली अलराउन्डर कुशल मल्लको कीर्तिमान तोड्ने नामिबियाका खेलाडीले चितवनबाट नेपाल प्रिमियर लिग (एनपिएल) खेल्ने भएका छन् ।
नामिबियाका जान निकोल लोफ्टी–इटनलाई चितवन राइनोजले एनपिएलका लागि अनुबन्ध गरेको हो ।
चितवन मेडिकल कलेजको स्वामित्वमा रहेको चितवन राइनोजमा अनुबन्ध हुने लोफ्टी चौथो विदेशी खेलाडी हुन् ।
यसअघि चितवनले मर्रस्यन्ट डी ल्यांगा, ल्यूक मार्टिन बेनकेन्स्टाइन र हसन इसाखिललाई अनुबन्ध गरिसकेको छ ।
बायाँ हाते २३ वर्षीय ब्याट्सम्यानले गत फ्रेबुअरीमा टी–२० मा सबैभन्दा छिटो शतकको कीर्तिमान बनाएका थिए । अहिले सबैभन्दा छिटो शतक बनाउने सूचीमा उनी दोस्रो स्थानमा छन् ।
नेपालमा भएको नेपाल, नामिबिया र नेदरल्यान्ड्स सम्मिलित त्रिदेशीय सिरिजमा उनले सो कोसेढुंगा पार गरेका थिए ।
कीर्तिपुरस्थित त्रिवि क्रिकेट मैदानमा घरेलु टोली नेपालविरुद्ध खेल्दै हाँले ३३ बलमा शतक बनाएका थिए ।
एक बल कम खेल्दै उनले नेपाली अलराउन्डर कुशल मल्लको (हाल सबैभन्दा छिटो शतक बनाउने सूचीमा चौथो स्थानमा) कीर्तिमान तोडेका थिए ।
कुशलले गत वर्ष चीनको होन्झाउमा भएको १९औँ एसियाली खेलकुद (एसियाड) मा मंगोलियाविरुद्ध ३४ वर्षमा शतक पूरा गरेका थिए ।
यसपटक दुवैले चितवन राइनोजबाट एनपिएल खेल्दै छन् ।
