विराटनगर । यसअघि पाँचपटक साफ महिला च्याम्पियनसिपको फाइनलमा स्थान बनाए पनि नेपाल उपाधिविहीन बन्दै आएको छ ।
सन् २०१० देखि सुरु भएको यस च्याम्पियनसिपको सातौँ संस्करण चल्दै गर्दा नेपाल सन् २०१६ मा भारतमा भएको चौथो संस्करणबाहेक सबैमा फाइनलमा पुगेको छ ।
बंगलादेशमा भएको पहिलो संस्करणमा भारतले नेपाललाई १–० गोलले हराउँदै उपाधि जितेको थियो भने श्रीलंकामा भएको दोस्रो संस्करणमा भारतले नेपाललाई ३–१ गोलले हरायो ।
पाकिस्तानमा भएको तेस्रो संस्करणको उपाधि भिडन्तमा नेपालले भारतसँग ६–० गोलको लज्जास्पद हार बेहोरेको थियो ।
चौथो संस्करण भारतमा भएको थियो, जहाँ नेपाल सेमिफाइनलसम्म पनि पुग्न पाएन । त्यसबेला घरेलु टोलीले बंगलादेशलाई ३–१ गोलले हराउँदै उपाधि घरमै राख्यो ।
पाँचौं संस्करणयता महिला साफ नेपालमै हुँदै आइरहेको छ । सन् २०१९ मा भएको पाँचौं संस्करणमा आयोजक नेपाललाई ३–१ गोलले हराउँदै भारतले उपाधि छिन्यो ।
अघिल्लो संस्करणमा भने घरेलु टिम नेपाल बंगलादेशसँग ३–१ गोलले नै हार्यो । अब, यसपालि भने बंगलादेशसँग बदला लिँदै नेपालले उपाधि घरमै राख्ने योजना बनाएको छ ।
सनसनीपूर्ण सेमिफाइनलमा यस पटक भारतलाई टाइब्रेकरमा ४–२ गोलले पन्छाउँदै नेपाल फाइनलमा पुगेको हो ।
पाँच पटकको च्याम्पियन भारतलाई सेमिफाइनलमा हराएको नेपालले बुधबार साँझ ६:३० बजे फाइनलमा पुनः साबिक विजेता बंगलादेशको सामना गर्दैछ ।
नेपाली टिम कप्तान एन्जिला तुम्बापो सुब्बाले विगतको संस्करणमा उपविजेता बनेको तितो क्षणलाई बिर्सेर यस पटक उपाधि जितेर छाड्ने बताउँछिन् ।
बंगलादेश धेरै राम्रो टोली भए पनि आफूहरू उपाधि हत्याउनका लागि खेल्ने उनको भनाइ छ । टोलीमा सबै खेलाडीको मनोबल उच्च रहेको बताउँदै उनले ‘हामी सक्छौं, हामी जित्छौं’ भन्ने नारालाई स्थापित गर्ने उल्लेख गरिन् ।
उनले नेपाली महिला फुटबलमा अहिलेको जस्तो राम्रो खेलाडी पाउन अझै आठ दश वर्ष लाग्ने भएकोले यस पटक उपाधि नजिते समयले नपर्खने बताए र
भारतविरुद्ध १० खेलाडीमा पनि सबैले राम्रो खेलेको स्मरण गराउँदै उनले विगत भुलेर आफ्नो पोजिसनमा सबैले ध्यान दिएर खेल्ने बताइन् ।
नेपालका मुख्य प्रशिक्षक राजेन्द्र तामाङले खेलाडीले व्यक्तिगत रूपमा जितको भावना राखेर खेलेमा उपाधि टाढा नभएको बताए ।
बंगलादेश प्राविधिक रूपमा धेरै राम्रो रहे पनि आफ्ना खेलाडीहरूको प्रदर्शन कमजोर नरहेको सुनाए ।
पाएको मौकालाई सदुपयोग गर्ने र आफ्नो पोजिसनमा राम्रो खेल्न खेलाडीलाई अनुरोध गर्दै उनले दर्शकको साथमा उपाधि जितेर छाड्ने बताए ।
यता, बंगलादेशका प्रशिक्षक पिटर बटलरले फाइनल खेल सोचेभन्दा प्रतिस्पर्धात्मक हुने बताए ।
नेपालले भारतविरुद्ध खेलेको सेमिफाइनल हेर्दा अचम्मित बनेको प्रतिक्रिया उनको छ ।
कप्तान सवीना खातुनले पछिल्लो समय बंगलादेशको प्रदर्शनमा सुधार आएकोले फाइनलमा झनै सुधारिएको खेल खेल्ने बताइन् ।
३० वर्षीय खातुन सन् २०१० देखि बंगलादेश महिला टोलीमा निरन्तर खेल्दै आएकी अनुभवी खेलाडी पनि हुन् ।
बंगलादेशविरुद्ध बुधबार मैदान उत्रिँदा नेपाली राष्ट्रिय महिला फुटबल टोलीले समग्रमा अन्तर्राष्ट्रिय प्रतियोगितामा १२औँपटक फाइनलमा खेल्दै छ ।
सातौँ दक्षिण एसियाली महिला फुटबल च्याम्पियनसिप (साफ)मा लगातार दोस्रोपटक फाइनल स्थान पक्का गरेको नेपालले उपाधि भिडन्तमा साबिक विजेता बंगलादेशविरुद्ध बुधबार दशरथ रंगशालामा प्रतिस्पर्धा गर्दै छ ।
दक्षिण एसियाली खेलकुद (साग)मा भारतले तीनपटक स्वर्णपदक भिडन्तमा नेपाललाई हराएको थियो ।
बंगलादेशसँग साफ महिला च्याम्पियनसिप, म्यानमारसँग हिरो महिला कप, जोर्डनसँग वाफ महिला च्याम्पियनसिप र उज्वेकिस्तानसँग नाजेज्दा कपको फाइनल खेल पनि गुमाएको थियो ।
नेपाल १२औँ फाइनल भिडन्तमा उपाधि जित्ने योजनामा छ ।
