काठमाडौं । समूह चरणको अन्तिम खेलमा बिहीबार नेपालले श्रीलंकाविरुद्ध ६–० को जित निकालेसँगै साफ महिला च्याम्पियनसिप २०२४ को सेमिफाइनल समीकरण पूरा भएको छ ।
बिहीबार सात हजार घरेलु समर्थकमाझ नेपाललाई जित दिलाउन रेखा पौडेलले दुई गोल गर्दा सावित्रा भण्डारी, अमिषा कार्की, रश्मीकुमारी घिसि र सविता रानामगरले समान एक गोल थपे ।
आजको खेलमा समूह ‘बी’ को विजेता बन्न नेपाललाई ६–० ले जित्नै पर्ने दबाब थियो ।
एकै समूहमा रहेको भुटानले दिनको पहिलो खेलमा माल्दिभ्सविरुद्ध १३–० को जित निकालेसँगै नेपाललाई यो दबाब थपिएको थियो ।
समीकरणअनुरुपको जित निकालेसँगै भुटानलाई गोलआधारमा पछि पार्दै नेपाल समूह विजेता बन्यो ।
यो समूहमा नेपाल र भुटान अन्तिम चारमा पुग्दा श्रीलंका तेस्रो स्थानमा रहँदै र माल्दिभ्स पुछारमा रहँदै प्रतियोगिताबाट बाहिरिए ।
प्रतियोगितामा माल्दिभ्स गोल नगर्ने एकमात्र टिम बन्यो ।
यता, समूह ‘ए’ बाट साविक विजेता बंगलादेशले शीर्ष स्थानमा हात पार्यो ।
समूहको आफ्नो अन्तिम खेलमा भारतविरुद्ध ३–१ को जित निकाल्दै बंगलादेश समूह विजेता बनेको हो ।
भारत समूह उपविजेता बन्यो ।
यसै समूहको पाकिस्तान भने एक अंक जोड्दै बाहिरिएको छ ।
पाकिस्तानले समूह चरणको खेलमा साविक विजेता बंगलादेशलाई १–१ को बराबरीमा रोक्दै सनसनी मच्चाएको थियो ।
नेपालले अब सेमिफाइनलमा प्रतियोगिताकै सबैभन्दा सफल टिम भारतसँग खेल्नेछ ।
भारतले साफका पछिल्ला ६ मध्ये पाँच संस्करणको उपाधि जितेको छ ।
नेपालले साफका पाँच फाइनलमा बेहोरेको हारमध्ये चारमा भारत नै बाधक बनेको थियो ।
यसअघि गत संस्करणमा पनि नेपालले सेमिफाइनमा भारत नै प्रतिद्वन्द्वी पाएको थियो ।
दशरथ रंगशालामै भएको उक्त खेलमा नेपालले भारतलाई १–० ले हराउँदै फाइनल यात्रा तय गरेको थियो ।
त्यसबेला नेपाललाई जित दिलाउन रश्मीले निर्णायक गोल गरेकी थिइन् ।
यी दुई टिमबीचको दोस्रो सेमिफाइनल आइतबार साँझ ६ः३० बजेदेखि सुरु हुनेछ ।
प्रतियोगिताको पहिलो सेमिफाइनलमा बंगलादेशले भुटानविरुद्ध खेल्नेछ ।
प्रतियोगिताको पहिलो सेमिफाइनलको रुपमा रहेको यो खेल सोही दिन दिउँसो १ः३० बजेदेखि सुरु हुनेछ ।
प्रतियोगिताको यस संस्करणमा दक्षिण एसियाका सातवटै देशले सहभागिता जनाएका थिए ।
