विराटनगर । साउदी अरेबियाली क्लब अल–हिलालका स्टार खेलाडी नेयमार प्रशिक्षणमा फर्किएका छन् ।
ब्राजिलियन स्टार नेयमार सन् २०२३ को अगष्टमा रियाद टोलीमा अनुबन्धित भएका थिए । तर, अक्टोबरमा अन्तर्राष्ट्रिय ड्युटीमा रहँदा बायाँ घुँडाको मेनिस्कस र एन्टेरियर क्रुसिएट लिगामेन्ट (एसीएल) फुटेपछि शल्यक्रिया गरिएको थियो ।
गत वर्षको अक्टोबर १७ मा घाइते भएपछि उनले रुँदै मैदान छोडेका थिए । त्यसयता मैदानबाहिर रहेका ३२ वर्षीय नेयमार शनिबारदेखि प्रशिक्षणमा फर्किएका हुन् ।
क्लबले नेयमार प्रशिक्षणमा फर्किएको पुष्टि गर्दै एएफसी च्याम्पियन लिगअन्तर्गत अल एनसँगको खेलमा समावेश हुने जनाएको छ ।
हिलाललाई अल एनले सोमबार राति पौने १० बजे आफ्नो मैदानमा आतिथ्यता प्रदान गर्ने छ, जसमा नेयमार सामेल हुने प्रशिक्षक जर्ज जेससले बताएका छन् ।
लामो प्रतीक्षापछि नेयमारले क्लबमा पुनरागमन गरेका हुन् । नेयमारले अल हिलालका लागि पाँच खेलमात्र खेलेका छन्, जसमा उनले एक गोल र तीन असिस्ट गरेका छन् ।
