विराटनगर । सहकारी ठगी र संगठित अपराधमा अनुसन्धानका लागि पक्राउ परेका पूर्वउपप्रधान तथा गृहमन्त्री एवम् राष्ट्रिय स्वतन्त्र पार्टीका सभापति रवि लामिछानेलाई आज अदालतमा उपस्थित गराइँदै छ ।
प्रहरीको केन्द्रीय अनुसन्धान ब्युरो (सिआइबी) ले शुक्रबार काठमाडौंबाट लामिछानेलाई पक्राउ गरेको थियो । उनलाई स्थलमार्ग हुँदै शनिबार बिहान पौन ३ बजे पोखरा पुर्याइएको थियो ।
अब आज प्रहरीले म्याद थपका लागि लामिछानेलाई कास्की जिल्ला अदालतमा उपस्थित गराउन लागेको हो ।
पूरक मुद्दाका लागि प्रहरीले अनुसन्धान अगाडि बढाएको छ । यसअघि सोही प्रकरणमा पक्राउ परेका छविलाल जोशीसँगै जोडेर लैजाने प्रहरीको तयारी छ । जोशीको भने बयान सकिएको छ ।
जोशीले सहकारीबाट रकम ल्याएर गोर्खा मिडियामार्फत अपचलन गर्ने कार्यमा जीबी राई, लामिछानेलगायत संलग्न रहेको भन्दै आफू निर्दोष रहेको जिकिर गरेका छन् ।
गत वर्षदेखि नै फरार रहेका राई हाल मलेसियामा रहेको प्रहरीले जनाएको छ ।
पोखराको सूर्यदर्शन सहकारीको बचत हिनामिनामा संलग्न रहेको आरोपमा हालसम्म ६० जनालाई प्रतिवादी बनाइएको छ ।
त्यसमध्ये ७ जनालाई अदालतबाट अनुमति लिएर र २ जनालाई जरुरी पक्राउ पुर्जी दिएर नियन्त्रणमा लिइएको थियो ।
यसअघि पक्राउ परेर मुद्दा चलाइएका मध्ये ६ जना पुर्पक्षका लागि हिरासतमा रहेका छन् ।
यता, रवि पक्राउ परेको विषयलाई लिएर रास्वपाका केन्द्रीय नेता एवम् कार्यकर्ताले शनिबार पोखरामा विरोध प्रदर्शन गरेका छन् ।
सहकारी ठगी, संगठित अपराध एवम् किर्तेसम्बन्धी कसुरमा अनुसन्धानका लागि पक्राउ परेका लामिछानेमाथि राजनीतिक प्रतिशोध साँधिएको भन्दै रास्वपा नेता एवं कार्यकर्ताले प्रदर्शन गरेका हुन् ।
विरोधसभालाई सम्बोधनका क्रमम रास्वपा नेताले षड्यन्त्रपूर्वक लामिछानेलाई फसाइएको भन्दै सरकारको आलोचना गरेका थिए ।
प्रदर्शनकारीले कांग्रेस उपसभापति धनराज गुरुङ र एमाले सांसद ऋषिकेश पोखरेल पनि सहकारी ठगीमा संलग्न रहेकाले कारबाही गर्नुपर्ने माग गरेका थिए ।
रविलाई पक्राउ गर्न राज्यको हतारो
रविलाई पक्रन हतारो देखाएको सरकारले बिदामा बस्न लागेका न्यायाधीशलाई बोलाएको थियो । घटस्थापनाको दिनदेखि नै बन्द रहेको कास्की जिल्ला अदालत शुक्रबार मात्रै खुलेको थियो ।
सात न्यायाधीश कार्यरत उक्त अदालतमा शुक्रबार कोही पनि उपस्थित थिएनन् । तर, न्यायाधीश कृष्णजंग शाहलाई अपराह्नतिर हतार–हतार अदालत बोलाइयो ।
कार्यालय समय सकिएपछि करिब साढे २ बजेतिर अदालत पुगेर उनले लामिछानेलाई पक्राउ गर्न अनुमति दिए ।
स्रोतका अनुसार शुक्रबार ६ न्यायाधीश बिदामै थिए । शाह पनि बिदामा बस्न खोजेका थिए ।
तर, लामिछानेलाई शुक्रबारै पक्राउ गर्ने सरकारको योजनाअनुसार नै उनलाई हतारमा बोलाएर पक्राउ अनुमति लिइएको थियो ।
दसैँ बिदामा नेपालगन्जस्थित घरमा रहेका उनलाई जसरी पनि शुक्रबार हाजिर हुन माथिल्लो तहबाट खबर पठाइएको स्रोत बताउँछ ।
लामिछानेलाई पक्राउ पुर्जी अनुमतिका लागि जिल्ला प्रहरी कार्यालय कास्कीका प्रमुखसहितको टोली अदालत गएका थिए ।
उनीहरू अदालत पुग्दा अदालतमा कोही पनि न्यायाधीश थिएनन् ।
लामिछानेकै मुद्दामा धेरै न्यायाधीश पन्छिन खोजेर पनि बिदामा बसेको जिल्ला अदालतका एक कर्मचारी बताउँछन् ।
न्यायाधीश शाह साढे २ बजे कार्यालय पुगेपछि कास्कीका एसपी श्यामबाबु ओलिया र डिएसपी वसन्त शर्माले पक्राउ पुर्जी लिएका थिए ।
प्रहरीले अपराह्न करिब ४ बजे मात्रै पक्राउ अनुमति पाएको थियो ।
न्यायाधीश शाह गत १५ साउनमा अर्घाखाँचीबाट कास्की सरुवा भएका थिए । उनी कांग्रेसनिकट मानिन्छन् ।
