विराटनगर । कहिलेकाँही फलफूल खाँदा फलसँगै बीउ पनि निलिन्छ ।
बच्चा बेलामा सबैले फलफूलको बीउ निल्दा पेटमा रुख फल्छ भनेर डर देखाउने गर्थे । तर, डराउनु पर्दैन ।
फलको बीउ पेटभित्र उम्रिँदैन । फल खाँदा संगै निलिने बीउले खासै केही पनि असर गर्दैन ।
मानिसको पाचन प्रणाली बलियो हुने हुँदा निलेको पूरै बीउहरू अन्त्यमा दिसासँगै बाहिर निस्केर जान्छ ।
किनभने जे कुरा हामी पूर्ण रूपमा चबाउँछौं, त्यो मात्र पच्ने गर्छ अन्य कुराहरू बाहिर फ्याँकिने हुन्छ ।
कुनै चिन्ताविना हामी केरा, अम्बक, अनार, र अन्य धेरै फलको बीउहरू खाने गर्छौं । बीउहरू पौष्टिक नै हुन्छन् । हामीले खाने मटर, राजमा, सिमीलगायतका गेडागुडी धेरै पौष्टिक हुन्छन् ।
तिल, मेथी, जीरालगायतका अन्य दाना खाएमा शरीरले पचाउँदैनन् केवल तिनीहरू पाचन प्रणालीबाट शरीरका अन्य फोहोरसँग मिसिएर बाहिर फालिन्छन् ।
यदि यस्ता बीउहरूको लाभ चाहिएमा राम्ररी चपाएर खानुपर्ने हुन्छ ।
तर, केही फलका बीउहरू जस्तै स्याउ, चेरी, एप्रिकटका बीउहरू विषाक्त हुन्छन् ।
एक वा दुई दाना निल्दा खासै हानिकारक नभए पनि धेरै खाएमा वा चबाएर खाँदा विषाक्त हुन सक्छ । स्याउ, चेरी तथा एप्रिकटमा पाइने तत्व पच्दा साइनाइडमा परिणत भइ विषाक्त हुने गर्छ ।
तर, हाम्रो शरीरले थोरै मात्रामा भएको साइनाइडलाई डिटा क्सिफाई गर्न सक्छ । धेरै मात्रामा खाएमा फुड पोइजनिङसमेत हुने सम्भावना रहन्छ ।
