काठमाडौं । विभागीय टोली नेपाल एपिएफ क्लबले एन्फा महिला लिगमा सुदूरपश्चिम प्रदेशमाथि गोल वर्षा गरेको छ ।
ललितपुरको सातदोबाटोस्थित एन्फा मैदानमा सोमबार भएको खेलमा एपिएफले सुदूरपश्चिमलाई १९–० गोलले हराएको हो ।
यो जारी लिगकै सर्वाधिक गोल अन्तरको जित हो । यसअघि अर्को विभागीय टोली त्रिभुवन आर्मी क्लबले सुदूरपश्चिमलाई नै १४–१ गोलले हराएको थियो ।
एपिएफको जितमा रश्मिकुमारी घिसिङ र अनिता केसीले समान चार गोल गरिन् । प्रीति राईले तीन गोल गर्दा कुसुम खतिवडा र सविता रानामगरको नाममा समान दुई गोल रह्यो ।
सरु लिम्बु, अनिता बस्नेत र रेनुका हमालले समान एक गोल आफ्नो नाममा टिपाइन् । एक गोल भने आत्मघाती रह्यो ।
जितसँगै शीर्ष स्थानमा रहेको एपिएफले आठ खेलमा २२ अंक पुर्याएको छ । समान खेल खेलेको सुदूरपश्चिम अंकविहीन छ ।
यसै गरी सोमबार नै भएको पहिलो खेलमा चन्द्रपुर नगरपालिका र कोशी प्रदेश १–१ गोलको बराबरी खेल्दै अंक बाँडेको छ ।
चन्द्रपुरका लागि सुनिता सुनारले सुरुवाती गोल गरिन् भने कोशीकी ममता राउतले खेलको अन्तिममा गोल गर्दै खेललाई बराबरीमा ल्याइन् ।
बराबरीसँगै आठ खेलबाट ११ अंक बनाएको कोशी पाँचौँ स्थानमा छ । समान खेलबाट आठ अंक बनाएको चन्द्रपुर सातौँ स्थानमा छ ।
