विराटनगर । चौथो संस्करणको युरोपियन नेसन्स लिगमा पोर्चुगलले लगातार दोस्रो जित निकालेको छ । आइतबार राति समूह चरणअन्तर्गत दोस्रो खेल खेलेको पोर्चुगलले स्कटल्यान्डलाई २-१ गोलले हराएको हो ।
पोर्चुगलको मैदानमा भएको खेलमा घरेलु टोलीलाई जिताउन कप्तान क्रिस्टियानो रोनाल्डो र ब्रुनो फर्नान्डेसले एक-एक गोल गरे । स्कटल्यान्डका स्कट एमसीटोमिनेले एक गोल गरे ।
खेलको सातौं मिनेटमा एमसीटोमिनेले गोल गर्दै पाहुना टोलीलाई सुरुआती अग्रता दिलाएका थिए । तर, खेलको ५४औं मिनेटमा फर्नान्डेसले गोल गर्दै पोर्चुगललाई बराबरीमा फर्काए ।
पोर्चुगललाई जिताउन रोनाल्डोको गोल नै निर्णायक बन्यो । खेलको ८८औं मिनेटमा रोनाल्डोले गोल गर्दै पोर्चुगललाई २-१ गोलले जिताए ।
यसअघि क्रोएसियालाई हराएको पोर्चुगलले दुई खेलमा ६ अंक जोडेको छ ।
