विराटनगर । आइसिसी टी-२० विश्वकप क्रिकेटअन्तर्गत समूह चरणको अन्तिम खेलमा सोमबार बिहान नेपालले बंगलादेशसँग खेल्दै छ ।
नेपाली समयानुसार भोलि बिहान ५ः१५ बजे हुने खेलमा नेपालले बंगलादेशसको सामना गर्न लागेको छ । उक्त खेलको लागि नेपालले तयारी गरिरहेको छ ।
समूह चरणबाट बाहिरिएको नेपालले टेस्ट टोली बंगलादेशविरुद्ध खेल्न आँटेको हो । वेस्ट इन्डिजको सेन्ट भिन्सेटमा हुने उक्त खेल नेपालका लागि प्रतिष्ठाको लडाइँ हुनेछ ।
समूह ‘डी’ अन्तर्गत शनिबार भएको प्रतिस्पर्धात्मक खेलमा नेपाल दक्षिण अफ्रिकासँग एक रनले पराजित भएसँगै विश्वकपबाट बाहिरिएको थियो ।
नेपाल यसअघि अमेरिकाको डालासमा भएको पहिलो खेलमा नेदरल्यान्ड्ससँग ६ विकेटले पराजित भएको थियो भने दोस्रो खेलमा एक अंक बटुलेको थियो ।
फ्लोरिडामा तय भएको श्रीलंकासँगको खेल भारी वर्षाका कारण रद्द भएपछि नेपालले एक अंक पाएको थियो ।
अब, नेपालका लागि सोमबारको खेलमा गुमाउनुपर्ने केही छैन । याे खेल जितेमा नेपालले जारी विश्वकपमा बलियो टेस्ट टोली बंगलादेशलाई हराएमा नयाँ इतिहास बनाउने छ ।
खेलअघि आइतबार आयोजित पत्रकार सम्मेलनमा नेपालका प्रशिक्षक मोन्टी देसाईले नेपाली खेलाडीको प्रदर्शन रामो भएपनि दक्षिण अफ्रिकाविरुद्ध मानसिक आत्मबल गुमाएको बताए ।
‘हार ब्यहोर्ने टोली सधैँ सफल जस्तो मानिन्छ । तर दक्षिण अफ्रिकाविरुद्ध नेपालले राम्रो खेलेको हो । अन्तिममा आत्मबल देखाउन नसक्दा हार खेपेको हो । टेस्ट राष्ट्रलाई हामी पनि विश्वकप खेलका हौँ भनेर देखाइरहेका छौँ । मोन्टीले बङ्गलादेश राम्रो टोली हो । तर नेपालले अन्तिम खेलमा बलियो चुनौती दिनेछ,’ मोन्टीले भने ।
उनले सबै खेलमा नेपाली खेलाडीले मानसिक आत्मबल देखाउन आवश्यक रहेको पनि बताए ।
दक्षिण अफ्रिकाविरुद्ध अन्तिममा नेपालका ब्याट्सम्यान सम्हालिन नसक्दा नेपालले जितको नजिक पुगेर हार खेपेको थियो ।
हाल समूहको दोस्रो स्थानमा रहेको बंगलादेश पनि नेपाललाई हराउँदै सुपर आठमा पुग्ने लक्ष्यमा छ ।
नेपाल र बंगलादेशबीच यसअघि सन् २०१४ को टी-२० विश्वकपमा भेट भएको थियो । त्यतिबेला नेपाल आयोजक बंगलादेशसँग आठ विकेटले पराजित भएको थियो ।
अहिले समूह ‘डी’ मा अपराजित दक्षिण अफ्रिका चार खेलबाट आठ अंक जोड्दै शीर्षस्थानमा छ । दक्षिण अफ्रिका नेपालविरुद्धको खेलअघि नै सुपर आठमा पुगिसकेको थियो ।
दोस्रो स्थानमा रहेको बंगलादेशको तीन खेलबाट चार अंक छ । तीन खेलबाट दुई अंक बनाएको नेदरल्यान्ड्स तेस्रो स्थानमा छ ।
नेपालको तीन खेलमा एक अंक छ । एक अंक बनाएको श्रीलङ्का अन्तिममा छ । सन् २०१४ को विश्वकप विजेता श्रीलंका पनि यस विश्वकपबाट बाहिरिसकेको छ ।
