विराटनगर । प्रदेश खेलकुद विकास बोर्ड कोशी प्रदेशको संरक्षणमा कर्पोरेट लेभलको विराट फुटसल च्याम्पियन्सिप हुने भएको छ ।
बिहीबार टाइसिट सार्वजनिक गर्दै च्याम्पियन्सिपका आयोजक मञ्जिना मुभि क्रिएसनका निर्देशक जतिन ताम्राकारले शुक्रबारबाट सुरु हुने च्याम्पियन्सिपमा विराटनगरका १० वटा टोलीको सहभागिता रहने बताए ।
२७ गतेसम्म आयोजना हुने च्याम्पियन्सिपमा विजेता टोलीले ट्रफीसहित २५ हजार रुपैयाँ हासिल गर्ने बताएका संयोजक ताम्राकारले विराटनगरमा लामो समयपछि कर्पोरेटस्तरको फुटसल हुन लागेको उल्लेख गरे ।
च्याम्पियन्सिप अन्तर्गत समूह ‘ए’ को तीनवटा खेल शुक्रबार बिहान र समूह ‘बी’ को खेल शनिबार हुने आयोजक पक्षले जनाएको छ ।
च्याम्पियन्सिपमा नेपाल फुलबारी, टिमुरे रेष्टुरा, पूर्वाञ्चल पेपर, एमएम ग्रुप, न्यूरो अस्पताल, एबी होटल, नेपाल पत्रकार महासंघ मोरङ र सीताराम फार्मेसीको सहभागिता रहेको छ ।
शुक्रबार बिहानबाट सुरु हुने खेलअन्तर्गत पहिलो खेलमा पावर जिमले एमएम ग्रुपको सामना गर्ने भएको छ ।
त्यसैगरी, सोही बेलुका दोस्रो खेलमा न्यूरो अस्पतालले सीताराम फार्मेसीको सामना गर्ने आयोजकले जनाएको छ ।
नक आउटका आधारमा हुने खेलमा पावर र एमएमको विजयी टोलीले दोस्रो खेलमा सिंहासन रेष्टुरासँग प्रतिस्पर्धा गर्नेछ ।
त्यसैगरी, शनिबार पहिलो खेलमा बेलुका टिमुरे रेष्टुराले नेपाल पत्रकार महासंघ मोरङको सामना गर्नेछ । दोस्रो खेलमा एबी होटलले नेपाल फुलबारीसंग खेल्नेछ ।
स्थानीय जाम्बुरे नेक्सस लञ्जमा सेमिफाइनल र फाइनल खेल आइतबार बेलुका हुने आयोजक पक्षका निर्देशक ताम्राकारले जानकारी दिए ।
