विराटनगर । कोशी प्रदेशका प्रदेश प्रमुख परशुराम खापुङले नयाँ सरकार गठनका लागि दाबी पेश गर्न आह्वान गरेका छन् ।
बुधबार राति ढिलागरी प्रदेश प्रमुखको कार्यालयबाट सरकार गठनका लागि शुक्रबार साँझ ५ बजेभित्र दाबी पेश गर्न सूचना जारी गरेका हुन् ।
बुधबार एमाले र माओवादीले दिएको निवेदनका आधारमा प्रदेश प्रमुख खापुङले राति साढे १० बज्न लाग्दा २८ गते शुक्रबार अपरान्ह ५ बजेसम्मको समय दिएर सरकार गठनको आह्वान गरे ।
प्रदेश प्रमुख खापुङले संविधानको धारा १६८ को उपधारा (५) अनुसार नयाँ सरकार गठनको आह्वान गरे ।
प्रदेशसभामा बहुमत जुटाउनसक्ने कुनै पनि सदस्यलाई मुख्यमन्त्रीको दाबी पेस गर्न प्रदेश प्रमुखले आह्वान गरेका छन् ।
मुख्यमन्त्री केदार कार्की पनि संविधानको सोही उपधाराअनुसार नियुक्त भएका हुन् ।
उनले गरेको आव्हानमा अनुसार भोलि बिहान दाबी प्रस्तुत गर्ने एमाले संसदीय दलका प्रमुख सचेतक रेवतीरमण भण्डारीले बताए ।
उनका अनुसार दिउँसो प्रदेश प्रमुखले सांसदहरूलाई सनाखत गराउने छन् ।
मुख्यमन्त्री केदार कार्कीले संविधानको धारा १८८ को उपधारा २ अनुसार विश्वासको मत नलिएपछि बुधबार दिनभर एमाले र माओवादी नयाँ सरकार गठनको आह्वान गराउन सक्रिय भएका थिए ।
सोही अनुसार प्रदेश प्रमुख पर्शुराम खापुङले नयाँ सरकार गठनको आह्वान गरेका हुन् ।
सरकारमा सहभागी दलले समर्थन फिर्ता लिएपछि ३० दिनभित्र मुख्यमन्त्रीले विश्वासको मत लिनुपर्ने संवैधानिक व्यवस्था रहेको भए पनि वैशाख २६ गते दिउँसो ३ बजेसम्म मुख्यमन्त्रीले विश्वासको मत नलिएपछि बुधबार एमाले र माओवादी केन्द्रले प्रदेशसभा सचिवालयको पत्रसहित प्रदेश प्रमुखसमक्ष नयाँ सरकार गठनको प्रक्रिया अगाडि बढाउन आग्रह गरेका थिए ।
