विराटनगर । न्यूरोड टिम काठमाण्डौं आठौं संस्करणको विराट गोल्डकप फुटबल प्रतियोगिताको क्वाटर फाइनलमा पुगेको छ ।
विराटनगरको शहिद रङ्गशालामा शुक्रबार भएको खेलमा विभागीय टीम त्रिभूवन आर्मी क्लबलाई २–० गोलान्तरले पराजित गर्दै एनआरटी क्वाटर फाइनलमा पुगेको हो । जितसँगै एनआरटीले आईतबारको दोश्रो क्वाटरफाइनल खेलमा भारतको सिक्किम ड्रेगानसँग प्रतिस्पर्धा गर्नेछ ।
शहिद रङ्गशालामा शुक्रबार भएको खेलमा भने जितको लागि एनआरटीका विदेशी खेलाडी रिचार्ड र आफिज ओलावाले गोल गरेका थिए । खेलको पहिलो हाफको २६ औं मिनेटमा एनआरटीका रिचार्डले गोल गरी टिमलाई अग्रता दिलाए । सेकेण्ड हाफको ७५ औं मिनेटमा आफिजले दोश्रो गोल गरी टिमको जित सुनिश्चित गरे । डि–बक्सभित्र वैकल्पिक खेलाडी सुदिप श्रेष्ठले निकालिदिएको पासलाई आफिजले हेडिङ गर्दा आर्मीका गोलकिपर सुमित श्रेष्ठले पञ्च गरेर नियन्त्रणमा लिन नसक्दा आकर्षक गोल भयो ।
आर्मीले खेल सुरु भएको ६ मिनेटमै प्राप्त गरेको गोल गर्ने अवसर गुमायो । टोलीका दिनेश हेमजुङको कडा प्रहार एनआरटीका गोलकिपर प्रमिजय गच्छदारले उत्कृष्ट बचाए । आर्मीका जिलेस्पी जङ्ग कार्कीले १३ औं मिनेटमा ३० यार्डदेखि गरेको कडा प्रहार पनि एनआरटीका किपर गच्छदारले नियन्त्रणमा लिँदै गोल हुन दिएनन् । त्यसलगतै दिनेशले बिट भइसकेको अवस्थामा बललाई सही दिशा दिन नसक्दा अवसर हुदाँ समेत गोल हुन सकेन् । १६ औं मिनेटमा एनआरटीका जय गुरुङले आर्मीका डिफेन्डरलाई क्रस गरेर पेनाल्टी एरियाबाट प्रहार समेत गोलमा परिणत भएन् । दोश्रो हाफबाट आर्मीले आक्रमक रुपमा खेल पस्किएपनि गोल गर्न नसक्दा घर फर्किन बाध्य भयो ।
खेलाडीहरुले प्राप्त गरेको अवसरलाई गोलमा परिणत गर्न नसक्दा हार व्यहोर्नुपरेको आर्मीका प्रशिक्षक मेघराज केसीले बताए । उनले अनुभवी खेलाडीहरुलाई मैदानमा उर्तान नसक्दा जित सुनिश्चित नभएको प्रतिक्रिया दिए । जितपछि एन.आर.टी.का सहायक प्रशिक्षक आशिष थापा मगरले भने खेलाडीको राम्राे टिमवर्कका कारण नतिजा आफ्नो पक्षमा आएको बताए ।
गोल्डकपको शुक्रबार भएको दोश्रो खेलको प्लेयर अफ द म्याच एनआरटी काठमाण्डौंका आफिज ओलावाले घोषित भए । उनले पुरस्कार स्वरुप नगद रु. ११ हजार प्राप्त गरे । उनलाई नेपाल खेलकुद महासंघका केन्द्रिय अध्यक्ष पर्शुराम बस्नेत र विराट गोल्डकप फुटबल ट्रष्टका अध्यक्ष किशोर बहादुर शाहीले संयुक्त रुपमा पुरस्कारको चेक हस्तान्तरण गरे ।
आठौं संस्करणको विराट गोल्डकपको शनिबारको पहिलो क्वाटरफाईनल खेल भने घरेलु टिम सङग्रीला मोरङ फुटबल क्लब र भुटानको रोयल थिम्पु फुटलब क्लबबिच हुनेछ ।
