विराटनगर । जारी सिजनको युरोपियन च्याम्पियन्स लिगअन्तर्गत अन्तिम आठमा पुग्ने सबै टोलीको टुंगो लागेको छ ।
बुधबार राति अन्तिम १६ का दुई खेल भएसँगै क्वार्टरफाइनल पुग्ने आठ टिमको छिनोफानो भएको हो ।
गए राति जर्मन क्लब बोरुसिया डर्टमन्डले डच क्लब पिएसभीलाई समग्रममा ३-१ गोलले हराउँदै क्वार्टरफाइनलमा स्थान बनायो ।
अर्को खेलमा स्पेनिस क्लब एथ्लेटिको मड्रिडले इटालियन क्लब इन्टर मिलानमाथि पेनाल्टी सुटआउटमा बाजी मार्यो ।
दुवै लेगमा २-२ गोलको बराबरी भएपछि पेनाल्टीमा खेल धकेलिएको थियो, जसमा एथ्लेटिकोले ३-२ गोलको जित निकाल्यो ।
त्यसअघि इंग्लिस क्लब आर्सनल, म्यानचेस्टर सिटी, स्पेनको बार्सिलोना, रियल मड्रिड, जर्मनको बायर्न म्युनिख र फ्रान्सको पिएसजी अन्तिम आठमा पुगिसकेका छन् ।
अब, शुक्रबार च्याम्पियन्स लिगको क्वार्टरफाइनल खेलको ड्र हुँदै छ ।
