विराटनगर । नेपालमा भएका अंगदानमध्ये ९० प्रतिशत महिलाले पुरुषलाई दान गरेका छन् । पुरुषले महिलालाई अंगदान गरेको बिरलै पाइन्छ ।
तर, हालैमात्र एक मनकारी ज्वाइँले सासूलाई कलेजो दान गरेका छन् ।
सहिद धर्मभक्त राष्ट्रिय प्रत्यारोपण केन्द्रमा सोमबार ४५ वर्षीय ज्वाइँ श्रीकृष्ण मानन्धरले आफ्नी सासूलाई कलेजो दान गरेका हुन् ।
उनले ६५ वर्षीया सासू लक्ष्मीदेवी श्रेष्ठलाई कलेजो दान गरेको सहिद धर्मभक्त राष्ट्रिय प्रत्यारोपण केन्द्रका कार्यकारी निर्देशक तथा कलेजो प्रत्यारोपणविज्ञ डा. पुकारचन्द्र श्रेष्ठले जानकारी दिए ।
२२औँ कलेजो प्रत्यारोपणमा डा. श्रेष्ठको नेतृत्वमा ज्वाइँको कलेजो सासूलाई प्रत्यारोपण गरिएको हो ।
हाल कलेजो दान गर्ने ज्वाइँ र सासूको स्वास्थ्य अवस्था सामान्य रहेको छ । डा. श्रेष्ठले ज्वाइँले सासूलाई कलेजो दान गर्नुले समाजमा ठुलो सन्देश दिएको बताए ।
सहिद धर्मभक्त राष्ट्रिय प्रत्यारोपण केन्द्रले नेपालमै पहिलो पटक २०७३ सालमा कलेजो प्रत्यारोपण गरेको थियो ।
केन्द्रले ११ वर्षको अवधिमा नेपालमा एक हजार २१२ जनाको मिर्गौला र २२ जनाको कलेजो प्रत्यारोपण गरिसकेको छ ।
केन्द्रमा १५ देखि २० लाख रुपियाँमा कलेजो प्रत्यारोपण हुने गरेको छ ।
केन्द्रका मिर्गौला रोग विशेषज्ञ डा. कल्पना श्रेष्ठले मिर्गौला प्रत्यारोपण भएको कुल एक हजार २१२ प्रत्यारोपणमा अंदाता महिला ८७३ (७२ प्रतिशत) र पुरुष ३३९ (२८ प्रतिशत) मात्र ग्रहणकर्ता छन् ।
ग्रहणकर्ता महिला २४६ (२१ प्रतिशत) हुँदा पुरुष ९५६ (७९ प्रतिशत) भएबाट नै महिला र पुरुषबीच भेदभावको अवस्था देखिएको छ ।
