विराटनगर । मोरङको विराटनगर महानगरपालिकामा तेस्रो संस्करणको इक्वालिटी कप क्रिकेट सुरु भएको छ ।
मंगलबार बिहान विराटनगर–६ केशलिया रोडनजिकै रहेको म्यारिलिबोन विराटनगर ज्वाला क्रिकेट मैदानमा सो प्रतियोगिताको उद्घाटन भएको छ ।
क्रिकेट एसोसियसन नेपाल (क्यान) का अध्यक्ष चतुरबहादुर चन्द, कोशी प्रादेशिक क्रिकेट संघका अध्यक्ष सर्वजितराज पाण्डेलगायतले प्रतियोगिताको उद्घाटन गरे ।
उद्घाटन समारोहमा बोल्दै क्यानका अध्यक्ष चन्दले महिला टोलीलाई विश्वस्त भई प्रतिस्पर्धा गर्न आग्रह गरे ।
पुरुष क्रिकेट टोलीले नेपालको छवी उच्च राखेको बताउँदै उनले भने, ‘पुरुष क्रिकेट टोलीका कारण आज हामी महिला र पुरुष दुवै टोलीका क्रिकेटरलाई तलब खुवाउने भएका छौं । महिला पनि प्रतिस्पर्धामा कम छैनन् भन्ने आत्मविश्वासका साथ खेल्नुहोस् ।’
आयोजक संस्थाका अध्यक्ष अभिषेक श्रेष्ठले महिला क्रिकेटको विकास र प्रवर्द्धन गर्ने हेतुले प्रतियागिताको आयोजना गरिएको जनाए ।
प्रतियोगितामा कोशी प्रदेश र मधेस प्रदेशका चार टोली महिलाको सहभागिता रहने छ । मोरङ जिल्ला क्रिकेट संघसँगको समन्वयमा हुने आँटेको उक्त प्रतियोगितामा कोशी प्रदेशका मोरङ र इलाम तथा मधेस प्रदेशका सप्तरी र सिरहाको सहभागिता रहने छ ।
जिल्ला क्रिकेट संघले छनोट गरेर पठाएका खेलाडीहरूले प्रतिनिधित्व प्रतियोगितामा रहने उनको भनाइ छ ।
प्रतियोगितामा सहभागी टोलीले एक–अर्कासँग प्रतिस्पर्धा गर्ने छन् र अंक तालिकाको शीर्ष दुई टिम उपाधिका लागि भिड्ने छन् ।
प्रतियोगिताको पहिलो दिन आ बिहान १० बजे मोरङ र सप्तरीले प्रतिस्पर्धा गरेका छन् भने दिउँसो २ बजे हुने आजको दोस्रो खेलमा इलाम र सिरहा भिड्ने छन् ।
प्रतियोगिताको फाइनल खेल भने अन्तर्राष्ट्रिय महिला दिवसको दिन हुने छ ।
