विराटनगर । कोशी प्रदेशका मुख्यमन्त्री केदार कार्कीको मन्त्रीमण्डलमा उदयपुरका दुई मन्त्री अटाएका छन् ।
गत असोज २७ गते मुख्यमन्त्री बनेका कार्कीले तेस्रो पटक शुक्रबार मन्त्रीमण्डल विस्तार गर्दा उदयपुरका दुई मन्त्री समेटिएका हुन् ।
आज चार मन्त्री र दुई राज्यमन्त्री नियुक्त गरेर मुख्यमन्त्री कार्कीले १० सदस्यीय मन्त्रीमण्डल बनाएका थिए ।
जसमा, उदयपुरका नारायण बुर्जामगर र रामकुमार खत्री मन्त्री बनेका हुन् ।
बुर्जामगर उदयपुर क्षेत्र नम्बर २ (क) बाट निर्वाचित बन्दै कोशी प्रदेशसभा सदस्य बनेका थिए ।
नेकपा माओवादी केन्द्रबाट निर्वाचित मगरले खानेपानी, सिंचाइ तथा ऊर्जा मन्त्रालय सम्हालेका छन् ।
यसैगरी, नेपाली कांग्रेसका खत्री उदयपुर क्षेत्र नं २ (ख) बाट निर्वाचित भएका थिए ।
खत्रीलाई मुख्यमन्त्री कार्कीले उद्योग, कृषि तथा सहकारी मन्त्रालयको जिम्मेवारी सुम्पिएका छन् ।
यस्तै, संखुवासभाबाट चुनाव जितेका राजेन्द्र कार्कीले सामाजिक विकास मन्त्रालयको जिम्मा पाए ।
ओखलढुंगाबाट निर्वाचित कांग्रेसका प्रदीपकुमार सुनुवारले स्वास्थ्य मन्त्रालयको जिम्मा पाए ।
यस्तै, कांग्रेसकी ईन्दिरा थापा र सुनिताकुमारी गुरुङले राज्यमन्त्रीका रूपमा शपथ लिइन् ।
कांग्रेसकी ईन्दिरा थापा भने आर्थिक मामिला तथा योजना मन्त्रालयमा राज्यमन्त्रीका रूपमा नियुक्त भएकी छन् ।
आर्थिक मामिला तथा योजना मन्त्रालय भने मुख्यमन्त्री केदार कार्की आफूसँगै राखेका छन् ।
यसैगरी, कांग्रेसकै गुरुङ आन्तरिक मामिला तथा योजना राज्यमन्त्री बनेकी छन् ।
नवनियुक्त चार जना मन्त्री र दुई राज्यमन्त्रीलाई प्रदेश प्रमुख परशुराम खापुङले पद तथा गोपनीयताको शपथ लिए ।
