विराटनगर । फिफा विश्वकप २०२६ को फाइलन खेल अमेरिका इस्ट रदरफोर्ड, न्यु जर्सीको मेटलाइफ स्टेडियममा हुने भएको छ ।
विश्व फुटबलको सर्वाेच्च निकाय फिफाले फाइनल खेल उक्त स्टेडियममा हुने जानकारी आइतबार दिएको हो ।
विश्वकप फुटबलको फाइनल खेल २०२६ को जुलाई १९ मा हुने तालिका छ ।
प्रतियोगिता मेक्सिको सिटीको एज्टेका स्टेडियममा जुन ११ बाट सुरु हुने छ ।
विश्वकप २०२६ का खेल तीन राष्ट्र अमेरिका, क्यानडा र मेक्सिकोमा हुनेछन् । अमेरिकाका ११, मेक्सिकोका ३ र क्यानडाका २ स्थानमा विश्वकपका खेल हुनेछन् ।
सन् २०२६ को विश्वकपमा ४८ राष्ट्र सहभागी हुनेछन्, जुन ३९ दिनसम्म चल्नेछ ।
एज्टेका स्टेडियम अर्जेन्टिनी लिजेन्ड डिएगो म्याराडोनाको ‘हेन्ड अफ गड’का लागि प्रसिद्ध छ ।
सन् १९८६ मा क्वार्टरफाइनलमा इंग्ल्यान्डविरुद्धको खेलमा म्याराडोनाले सो गोल यही रंगशालामा गरेका थिए । रंगशाला ८३ हजार दर्शक क्षमताको रहेको छ ।
मेक्सिकोले सन् १९७० र १९८६ को विश्वकपको आयोजना गरेको थियो । अमेरिकाले सन् १९९४ को विश्वकपको आयोजना गरेको थियो ।
क्यानडाले भने पहिलो पटक विश्वकपको आयोजना गर्न लागेको हो । टोरेन्टोमा जुन १२ मा पहिलो खेल हुने छ । अमेरिकाले जुन १२ मा लस एन्जल्समा पहिलो खेल खेल्नेछ ।
विश्वकपको पछिल्लो संस्करण कतारले आयोजना गरेको थियो । कतार विश्वकप भन्दा सन् २०२६ को विश्वकप १० दिन बढी सञ्चालन हुने छ ।
