विराटनगर । दक्षिण अफ्रिकामा जारी यु-१९ विश्वकप क्रिकेटमा शुक्रबार (आज) नेपाली टोलीले अन्तिम खेल खेल्दै छ ।
प्रतियोगिताबाट बाहिरिसकेको नेपालले सुपर सिक्सअन्तर्गत आज भारतको सामना गर्न आँटेको हो ।
दक्षिण अफ्रिकाको ब्लमफन्टेनस्थित मंगाउङ ओभलमा हुने नेपाल र भारतबीचको खेल नेपाली समयानुसार दिउँसो पौने २ बजेबाट सुरु हुने छ ।
यो खेल नेपालको औपचारिक खेलमात्र हो । नेपाल यसअघि नै प्रतियोगिताबाट बाहिरिसकेको छ ।
विश्वकपमा समूह ‘डी’ बाट प्रतिस्पर्धा गरेको नेपाल पहिलो खेलमा न्युजिल्यान्डसँग ६४ रनले पराजित भएको थियो ।
दोस्रो खेलमा नेपालले पाकिस्तानसँग पाँच विकेटको हार खेपेको थियो । तेस्रो खेलमा नेपालले अफगानिस्तानलाई एक विकेटले हराउँदै सुपर सिक्समा स्थान बनाएको थियो ।
तर, सुपरसिक्सका खेलमा भारत र पाकिस्तान दुवै टोली विजयी भएपछि नेपालको सेमिफाइनल पुग्ने सम्भावना समाप्त भएको थियो ।
आज नेपालसँग खेल्दा भारत अन्तिम चारमा पुग्ने दाउमा हुने छ । यसअघि गत डिसेम्बरमा भएको समूह चरणको खेलमा भारतले नेपालमाथि १० विकेटको सहज जित निकालेको थियो ।
