विराटनगर । गायिका रचना रिमाल सवार गाडी दुर्घटनामा परेको छ ।
नेपालगन्जबाट दाङको लमही महोत्सवका निम्ति हिँडेकी रिमाल सवार बा१६च ८३४३ नम्बरको स्कार्पियो जिप दुर्घटनामा परेको हो ।
आइतबार साँझ उनी सवार जिपलाई बागमती प्रदेश ०३–०१ ख २११८ नम्बरको ट्रकले बाँकेको टिस्टानजिकै ठक्कर दिएको थियो ।
सामाजिक सञ्जालमार्फत् यनले नेपालगन्जबाट दाङको लमही महोत्सवमा जाँदै गर्दा आफू सवार गाडी दुर्घटनामा परेको जानकारी दिएकी हुन् ।
आफ्नो अवस्था भने सामान्य रहेको उनले बताएकी छन् ।
‘आज नेपालगन्ज विमानस्थलबाट दाङ लमही महोत्सवमा जाँदै गर्दा हामी सवार गाडीलाई विपरीत दिशाबाट आइरहेको ट्रकले ठक्कर दियो । गाडीमा केही क्षति पुगेको छ । यात्रुहरू हामी सबै सकुशल छौँ । साथै, आज लमही महोत्सवमा हुने भनिएको मेरो सांगीतिक प्रस्तुति भोलि रहने सबैमा जानकारी गराउँदछु । आज उपस्थित हुन नसकेकोमा क्षमा चाहन्छु,’ उनले लेखेकी छन् ।
