विराटनगर । पछिल्ला दुई संसदीय निर्वाचनमा हार बेहोरेका नेपाली कांग्रेसका कृष्णप्रसाद सिटौला राष्ट्रियसभा सदस्य बनेका छन् ।
प्रतिनिधिसभाका अघिल्ला दुई निर्वाचनमा राष्ट्रिय प्रजातन्त्र पार्टी (राप्रपा) का राजेन्द्र लिङ्देनसँग पराजय बेहोरेका सिटौलाले यसपालि भने राप्रपाकै उम्मेदवारलाई पछारेका हुन् ।
कोशी प्रदेशमा राष्ट्रियसभाको दुई सिटका लागि भएको निर्वाचनमा चार जनाले चुनावी प्रतिस्पर्धा रोजेका थिए ।
जसमध्ये, एउटा सिट कांग्रेसका पूर्वमहामन्त्रीसमेत रहेका सिटौलाले आफ्नो बनाए ।
सत्तारूढ गठबन्धन दलका तर्फबाट राष्ट्रियसभा सदस्यको उम्मेदवार बनेका सिटौलाले राप्रपाका उद्धव पौडेललाई पराजित गरेका हुन् ।
राप्रपाका उपाध्यक्षसमेत रहेका पौडेल नेकपा एमालेसँग सहकार्य गरेर सिटौलालाई रोक्ने उद्देश्यका साथ चुनावमा उभिएका थिए ।
राप्रपासँग चुनावी गठबन्धन गरेर एमालेले आफ्ना उम्मेदवार पर्शुराम अधिकारीलाई फिर्ता बोलाएको थियो ।
तर, मतपत्रमा अधिकारीको नाम रहेपछि त्यसमा पनि पाँच मत परेको थियो । जसलाई पछि निर्वाचन आयोगको कार्यालयले बदर मत भनेको थियो ।
यो जितसँगै सिटौला हारको ‘ह्याट्रिक’ बाट मात्र जोगिएनन्, ७७ वर्षको उमेरमा सत्ता–शक्तिमा पुनरागमन गर्नसमेत सफल भए ।
गत प्रतिनिधिसभा निर्वाचनमा झापा क्षेत्र नम्बर–३ बाट पराजित भएका सिटौलालाई राप्रपाका अध्यक्ष राजेन्द्र लिङ्देनले एमालेको सहयोग लिएर पराजित गरेका थिए ।
सिटौला त्यसअघि २०७४ को निर्वाचनमा पनि लिङ्देनसँग नै पराजित भएका थिए ।
सिटौला यसपालि राष्ट्रपतिको आकांक्षी थिए । तर, रामचन्द्र पौडेल राष्ट्रपति बनेपछि उनले राष्ट्रियसभा ताकेका थिए ।
हुन त चुनाव हारेकालाई राष्ट्रियसभाको उम्मेदवार बनाउन हुँदैन भनेर कांग्रेसभित्र मत नबाझिएको होइन ।
तर, कांग्रेसको गत महाधिवेशनदेखि सभापति शेरबहादुर देउवालाई सहयोग गर्दै आएका सिटौलालाई राष्ट्रियसभा छिर्नबाट कसैले रोक्न सकेन ।
देशले नयाँ संविधान प्राप्त गरेपछि संसद् प्रवेश गर्नबाट बञ्चित भएका उनको संसद् प्रवेश गर्ने चाहना यसपालि पूरा भएको छ ।
संसद् प्रवेशमात्र नभएर राष्ट्रियसभाको अध्यक्षकै रूपमा उनको चर्चा छ । राष्ट्रियसभाको अध्यक्ष बनाउनकै लागि गठबन्धनले उनलाई जिताएको चर्चा छ ।
माओवादीलाई शान्ति प्रक्रियामा ल्याउन भूमिका निर्वाह गरेका सिटौला करिब एक दशक लगभग शक्तिविहीन थिए ।
तर, अहिले पुनः सत्ता–शक्तिमा ल्याउन माओवादीलगायत गठबन्धन दलको समर्थन रह्यो ।
कांग्रेस सभापति देउवानिकट मानिने सिटौलालाई संस्थापन इतर (डा. शेखर कोइराला) पक्षले उनलाई असहयोग गर्ने शंका थियो ।
तर, कोइरालामात्र नभएर कांग्रेसका महामन्त्रीद्वय गगन थापा र विश्वप्रकाश शर्माले खुलेरै समर्थन गरे । जसका कारण पनि उनको जित सुनिश्चित भयो ।
सत्तारूढ गठबन्धनका सिटौलाले जित हासिल गर्दा गठबन्धनकै चम्पादेवी कार्की भने पराजित भइन् ।
नेकपा माओवादी केन्द्रकी कार्कीलाई हराउँदै एमालेकी रुक्मिणी कोइराला राष्ट्रियसभा सदस्य बन्न सफल भएकी हुन् ।
अप्रत्याशित रूपमा राष्ट्रियसभा सदस्यको टिकट पाएकी कोइराला राष्ट्रियसभा निर्वाचनमा एमालेबाट निर्वाचित एकमात्र उम्मेदवार पनि हुन् ।
राष्ट्रियसभाका रिक्त १९ सिटमा एमालेले १८ जनानै उम्मेदवार उठाएको भए पनि सबै उम्मेदवार पराजित भएका थिए ।
निर्वाचित भएपछि उनले राष्ट्रियसभामा आफूले महिला सशक्तीकरण र मुलुकलाई अधिकारसम्पन्न बनाउने विषयमा जोड दिने बताइन् ।
सुनसरी इटहरीकी कोइराला एमालेमा लामो समयदेखि क्रियाशील छिन् ।
करिब ४७ वर्षदेखि एमालेमा क्रियाशील भए पनि कुनै पनि लाभको पदमा कोइराला पुगेकी थिएनन् ।
अब, उनी ६ वर्षका लागि राष्ट्रियसभा सदस्यमा निर्वाचित भइन् ।
उनी एमाले कोशी प्रदेश सल्लाहकार समिति सदस्य, अखिल नेपाल महिला संघकी केन्द्रीय सदस्य तथा सुनसरी इन्चार्जको भूमिकामा छिन् ।
यता, आफूलाई हराउन गठबन्धन दलबाटै षड्यन्त्र भएको भन्दै माओवादीकी उम्मेदवार कार्कीले दिक्क मानेकी छन् ।
‘नेता र नेतृत्वतहबाट नै यति ठुलो बेइमानी, षड्यन्त्र, धोका कल्पना पनि गर्न सकिन्न,’ उनले सामाजिक सञ्जालमा लेखेकी छन्, ‘जे होस् यसले मलाई ठुलो शिक्षा मिलेको छ ।’
कांग्रेसले अन्तरघात गर्यो : माओवादी
गठबन्धनकै कार्कीले हारेपछि माओवादीले भने कांग्रेससँगको सहकार्य भंग हुने चेतावनी दिएको छ ।
गठबन्धनका उम्मेदवार सिटौला विजयी भएर आफ्ना उम्मेदवार पराजित हुनुलाई योजनाबद्ध राजनीतिक बेइमानी भएको निष्कर्ष माओवादीको छ ।
माओवादी केन्द्र कोशी प्रदेशका अध्यक्ष हर्कबहादुर नेम्वाङले कोशी प्रदेशमा कांग्रेसले पटक–पटक धोका दिएको भन्दै सहकार्य भंग हुने चेतावनी दिएका हुन् ।
यसअघि कोशी प्रदेश सरकार निर्माणमा ईन्द्रबहादुर आङ्बोलाई छेक्न कांग्रेसबाट षड्यन्त्र भएको उनले बताएका छन् ।
राष्ट्रियसभा निर्वाचमा सत्तारूढ गठबन्धनमा रहेका तीन सांसद र स्थानीय तहका १३ प्रतिनिधिले कार्कीको साटो एमाले उम्मेदवार कोइरालालाई मतदान गरेका थिए ।
त्यसभन्दा अगाडि कांग्रेसकै कारण संसदमा माओवादीले सभामुख गुमाउनुपरेको थियो ।
माओवादीका बाबुराम गौतमलाई राजीनामा गर्न लगाएर कांग्रेसका उद्धव थापा मुख्यमन्त्री बनेका थिए ।
