विराटनगर । राष्ट्रियसभा सदस्य निर्वाचनअन्तर्गत कोशी प्रदेशबाट नेपाली कांग्रेसका कृष्णप्रसाद सिटौला र नेकपा एमालेकी रुक्मिणी कोइराला निर्वाचित भएकी छन् ।
बिहीबार प्रदेशमा दुई सिटका लागि भएको निर्वाचनमा सत्तारूढ दलका तर्फबाट सिटौला र एमाले-राप्रपा गठबन्धनबाट कोइराला निर्वाचित भएको कोशी प्रदेश निर्वाचन आयोगको कार्यालयले जनाएको छ ।
सिटौलाले विपक्षी नेकपा एमाले र राप्रपा गठबन्धनका उम्मेदवार उद्धव पौडेललाई पराजित गरेका हुन् ।
सिटौलाले ५ हजार २९२ मत प्राप्त गरे भने उनका निकटतम् प्रतिद्वन्द्वी राप्रपाका उद्धव पौडेलले ४ हजार ५६२ मत प्राप्त गरे ।
नेकपा एमालेका उम्मेदवार पर्शुराम अधिकारीले १४८ मत प्राप्त गरे छ । सिटौला ७३० मत अन्तरले विजयी भएका हुन् ।
नेता सिटौलाले कुल ९३ जना प्रदेशसभा सदस्यमध्ये ४५ जनाको मत प्राप्त गरे भने पौडेलले ४७ जनाको मत प्राप्त गरे । एक मत भने बदर भएको छ ।
यस्तै, महिलातर्फ एमालेकी उम्मेदवार कोइराला निर्वाचित भइन् ।
राप्रपासँग चुनावी तालमेल गरेको एमालेको तर्फबाट उम्मेदवार बनेकी कोइरालाले गठबन्धनका उम्मेदवार चम्पादेवी कार्कीलाई पराजित गरेकी हुन् ।
कोइरालाले पाँच हजार ८६ मत प्राप्त गर्दा कार्कीले ४ हजार ९९२ मत प्राप्त गरिन् । कार्कीलाई गठबन्धनका तीन जना प्रदेशसभा सदस्यले मत क्रस गरेको गणनाका क्रममा देखिएको थियो ।
कुल ९३ जना प्रदेशसभा सदस्यमध्ये कोइरालाले ४९ जना सांसदको मत प्राप्त गरिन् भने कार्कीले ४४ जनाको मत प्राप्त गरिन् ।
