विराटनगर । काेसी प्रदेश सरकारले नामकरणको विषयमा आन्दोलनरत पहिचान पक्षधरसँग वार्ता गर्नका लागि तीन सदस्यीय टोली गठन गरेको छ ।
पहिचान पक्षधरसँग वार्ता गर्नका लागि सरकारले भाैतिक पूर्वाधार विकासमन्त्री कमलप्रसाद जबेगुकाे नेतृत्वमा तीन सदस्यीय वार्ता समिति गठन गरेकाे हो ।
वार्ता समिति सदस्यमा पर्यटन, वन तथा वातावरणमन्त्री गणेश उप्रेती र सदस्य सचिवमा आन्तरिक मामिला तथा कानून मन्त्रालयका सचिव लक्ष्मीप्रसाद पाैडेल रहने छन् ।
प्रदेश मन्त्रिपरिषद्काे शनिबार बसेकाे बैठकले यस्तो निर्णय गरेको सरकारका प्रवक्ता एवम् आन्तरिक मामिला तथा कानूनमन्त्री शम्शेर राईले जानकारी दिए ।
प्रदेशसभा बैठकले फागुन १७ गते प्रदेशकाे नाम ´काेसी` पारित गरेदेखि पहिचान पक्षधरले प्रदेश १ पुन: नामकरण संयुक्त संघर्ष समिति गठन गरी आन्दाेलन गरिरहेका छन् ।
सो आन्दाेलनका क्रममा आन्दाेलनरत पक्षका पदम लिम्बुकाे मृत्युसमेत भएको थियो ।
मुख्यमन्त्री केदार कार्कीले किरात सभ्यतालाई शीरमा राखेर आदिवासी जनजातिकाे पहिचान कायम गर्दै माग र मुद्दा सम्बाेधनका लागि आन्दाेलनरत पक्षसँग वार्ता समिति गठन गरेकाे बताएका छन् ।
वार्ता समिति संयाेजक मन्त्री जबेगुले तत्काल समितिकाे बैठक बसेर निर्णय गरी आन्दाेलनरत पक्षलाई पत्राचार गरेर वार्ता प्रक्रिया अघि बढाउने बताएका हुन् ।
