विराटनगर । पाँच महिनादेखि कोशी प्रदेशसभा सभामुखविहीन छ ।
गत साउन १६ तत्कालीन सभामुख बाबुराम गौतमले राजीनामा दिएर कांग्रेस संसदीय दलका नेता उद्धव थापालाई मुख्यमन्त्री बनाउन सघाएयता कोशीमा सभामुख पद रिक्त छ ।
गत वर्षको पुस २८ गते निर्विरोध निर्वाचित सभामुख गौतमले राजीनामा दिँदै आर्थिक मामिला तथा योजना मन्त्रालय रोजेका थिए ।
त्यसयता रिक्त रहेको सभामुख चयनको प्रक्रिया अझै पनि अलपत्र नै छ ।
तर, अब भने सत्तापक्ष दलहरूले सभामुख चयन प्रक्रिया टुंग्याउने तयारी थालेका छन् ।
मंगलबार (भोलि) दिनभर लगाएर भए पनि सभामुख चयन प्रक्रिया टुंग्याउने तयारीमा सत्तापक्ष गठबन्धन लागेको छ ।
भोलि नै निर्वाचन प्रक्रिया घोषणा हुने र भोलि नै सक्नेगरी कार्य तालिका आउने गठबन्धनका नेता बताउँछन् ।
नेपाली कांग्रेस, नेकपा माओवादी केन्द्र, नेकपा (एकीकृत समाजवादी) र जसपा राप्रपालाई सभामुख दिन तयार देखिएका छन् ।
राप्रपा पनि सभामुख लिन तयार देखिएको छ ।
राप्रपाले आफ्ना सांसद अम्बरबहादुर विष्टको नाममा सहमति जनाइसकेको छ ।
तर, प्रमुख प्रतिपक्षी दल नेकपा एमालेले सभामुख चयनको प्रक्रियालाई टार्ने संकेत गरेको छ ।
एमाले यसअघि सभामुख चयनको प्रक्रियामा सहमत देखिएको थियो ।
एमालेले भने राष्ट्रियसभा निर्वाचनका लागि उम्मेदवारी दर्ता भएपछि आचारसंहिता लाग्ने भएकोले भोलि नै टुंगो लाग्ने कुरामा शंका रहेको बताएको छ ।
एमाले संसदीय दलका उपनेता रामबहादुर राना मगरले आचारसंहिता लाग्ने या नलाग्ने भन्ने विषयमा निष्कर्षमा नपुगी सभामुख चयन नहुने बताए ।
एमालेका प्रमुख सचेतक रेवती रमण भण्डारीले पनि निर्वाचन आयोगसँग परामर्श लिएर मात्रै सभामुख चयन प्रक्रिया अगाडि बढ्ने बताए ।
निर्वाचन आयोगका प्रवक्ता शालिग्राम शर्मा पौडेलले कोशी प्रदेशको सभामुख चयन गर्ने विषय आचारसंहिताले अहिलेको लागि नरोक्ने बताए ।
