विराटनगर । कोसी प्रदेशका मुख्यमन्त्री केदार कार्कीले आइतबार आफ्नो ४५औं जन्मदिन मनाउँदै छन् । तर, आज जन्मदिनकै दिन उनीमाथि गालीको वर्षा भइरहेको छ ।
तमु ल्होसारको शुभकामना सन्देश जारी गर्दा कोसी प्रदेश नलेखेको भन्दै उनलाई सामाजिक सञ्जालमा गाली गरिरहेका छन्, सामाजिक सञ्जाल प्रयोगकर्ताहरूले ।
आज गुरुङ समुदायले मनाउने तमु ल्होसारको शुभकामना सन्देश जारी गर्दा मुख्यमन्त्री कार्कीले ‘लेटर हेडमा’ कोशी प्रदेश लेख्न छुटाएका थिए ।
संविधान र राज्यले चिन्ने मुख्यमन्त्री पदको जिम्मेवारीमा रहेका कार्कीले प्रदेशको नाम लेख्न बिर्सिएपछि अहिले उनी आलोचनाको सिकार भइरहेका छन् ।
मुख्यमन्त्रीले कोसी प्रदेशको नाम उल्लेख नगरेपछि यस घटनालाई अर्थपूर्ण रूपमा हेरिएको छ । य
स विषयमा अनेकन अड्कलबाजी गर्दै विभिन्नखाले प्रतिक्रिया आइरहेका छन् ।
कतिपयले पूर्वी नेपालमा पहिचान पक्षधरको आन्दोलन जारी रहेको बेला उनीहरूको मागलाई ‘सम्मान गर्दै’ कोसी प्रदेश उल्लेख नगरेको हुनसक्ने अनुमान गरेका छन् ।
कतिपयले भने सचिवालयको गम्भीर लापरबाही भनेका छन् ।
मुख्यमन्त्री कार्कीले आफ्नोसमेत मतले प्रदेश १ लाई कोसी प्रदेश नामाकरण गर्न योगदान गरेका थिए । तर, मुख्यमन्त्री बनेपछि भने उनले नियतबस यसो गरेको कतिपयको आक्षेप छ ।
प्रमुख प्रतिपक्षी दल नेकपा एमाले कोसी प्रदेशका प्रमुख सचेतक रेवतीरमण भण्डारीले मुख्यमन्त्री कार्कीले प्रदेशवासीको नाममा स्पष्टीकरण जारी गर्नुपर्ने बताउँछन् ।
‘जानेर हो या भूलबस हो, यो त गम्भीर त्रुटी हो,’ उनले भने, ‘उहाँ आजै प्रतिपक्षी दल र प्रदेशवासीलाई स्पष्ट पार्नुपर्छ ।’
मुख्यमन्त्रीको शुभकामना सन्देशमा के छ ?
गुरुङ समुदायको विशेष पर्व तमु ल्होसारको उपलक्ष्यमा वक्तव्यमार्फत जारी गरिएको शुभकामना सन्देशमा उनले नेपाल बहुधार्मिक एवम् बहुसाँस्कृति मुलुक भएको बताउँदै तमु ल्होसारले आम नेपालीबीच भातृत्व र एकताको भावना बढाउने विश्वास पनि व्यक्त गरेका छन् ।
तर, उनले शुभकामना व्यक्त गरेको मुख्यमन्त्रीको लेटरहेडमा भने प्रदेशको नाम उल्लेख गरिएको थिएन ।
लेटरहेडको दाइनेतिर ‘मुख्यमन्त्री’ लेखेर स्वस्तिक छापको चिह्न राखिएको थियो भने देब्रेतिर ‘विराटनगर नेपाल’ लेखिएको थियो ।
शुभकामनाको व्यहोरा लेखेर अन्तिमतिर मुख्यमन्त्रीको नाम र हस्ताक्षर छ ।
यसरी प्रदेशको नाम उल्लेखै नगरी शुभकामना दिएपछि सामाजिक सञ्जालमा उनको चर्को आलोचना भयो ।
सबैतिर विरोध र टीका-टिप्पणी हुन थालेपछि मुख्यमन्त्री कार्कीको सचिवालयले सच्याएर पुन: शुभकामना सन्देश जारी गरेको छ ।
‘तमु ल्होसारको अवसरमा माननीय मुख्यमन्त्रीज्यूले जारी गर्नुभएको शुभकामना सन्देशमा कोसी प्रदेश छुट्न गएकोमा सच्याइएको छ’ भन्दै मुख्यमन्त्री कार्यालयले फेरि प्रदेशको नाम राखेर सन्देश जारी गरेको छ ।
गत वर्षको फागुन १७ गते प्रदेशको नाम कोशी राखिएपछि असन्तुष्ट पक्षले यस विषयलाई लिएर आन्दोलन गरिरहेकै छ ।
आन्दोलनका क्रममा घाइते भएका पदमबहादुर लिम्बु लाजेहाङको गत चैत १० गते मृत्यु भएको थियो ।
