विराटनगर । प्रधानमन्त्री पुष्पकमल दाहाल ‘प्रचण्ड’ ले कतिपय मन्त्रीले ठिकसँग काम गर्न नसकेको बताउँदै मन्त्री फेरेर भए पनि सरकारको कामलाई गति दिने बताएका छन् ।
जनतासँग माओवादी विशेष रूपान्तरण अभियानअन्तर्गत शुक्रबार नेकपा (माओवादी केन्द्र) मिक्लाजुङ-५ ले आयोजना गरेको कार्यक्रममा सम्बोधन गर्दै उनले यस्तो बताएका हुन् ।
माओवादी केन्द्रका अध्यक्षसमेत रहेका प्रचण्डले निरन्तरतामा क्रमभङ्ग गर्ने आफ्नो विशेषता भएको चर्चा गर्दै सरकारले एक वर्ष पूरा गरेपछि नयाँ ढङ्गले अगाडि बढ्ने बताए ।
‘म निरन्तरतामा क्रमभङ्ग गर्छु, सरकारले १० गते एक वर्ष पूरा गर्दैछ,’ उनले भने,’११ गते बाटै नयाँ ढङ्गले काम सुरु गर्ने तयारीमा छु ।
कतिपय मन्त्रालयका मन्त्रीले ठिकसँग काम गर्न नसकेको भन्दै उनले मन्त्री फेरेर कामलाई गति दिने बताए ।
प्रधानमन्त्रीले स्थानीय जनताको मागबमोजिम सडक तथा खानेपानीका विभिन्न तीन योजनाका लागि तत्काल पहल गर्ने प्रतिबद्धता जनाए ।
दूध किसानहरूको बक्यौता भुक्तानी चाँडै गर्ने विश्वास पनि उनले दिलाए ।
