विराटनगर । प्रधानमन्त्री पुष्पकमल दाहाल ‘प्रचण्ड’ले कोसी प्रदेशमा नामकरणको विषयमा देखिएको असन्तुष्टि संवाद र छलफलको माध्यमबाटै समाधान गर्नुपर्नेमा जोड दिएका छन् ।
बिहीबार विराटनगर विमानस्थलमा सञ्चारकर्मीसँग कुराकानी गर्दै प्रधानमन्त्री प्रचण्डले प्रदेश नामकरणको असन्तुष्टस संवाद र छलफलकै माध्यमबाट गरिने बताएका हुन् ।
प्रदेशको नाम परिवर्तन गर्न आन्दोलनरत पहिचान पक्षधरलाई अतिवादतिर नजान पनि प्रधानमन्त्रीको सुझाव छ ।
‘यो विषय सबै मिलेर छलफल गरेर संवादकै तरिकाले शान्तिपूर्ण ढङ्गले यसको समाधान गर्नुपर्छ,’ उनले भने, ‘नामको विषयमा आन्दोलनमा जाने साथीहरूलाई पनि भेटेर एक्स्ट्रिममा जान दिनुहुँदैन भनेको छु ।’
यस्तै, प्रधानमन्त्री प्रचण्डले एक वर्षमा आफूले सोचेअनुसार नतिजा दिन नसकेपनि सरकार असफल भने नभएको बताए ।
गठबन्धनका सीमा र परिस्थितिको अफ्ठेरोको कारण सोचेजति काम हुन नसकेको पनि उनको भनाइ छ ।
‘मैले जति सोचेको हो, त्यसरी काम भयो भन्ने मेरो दाबी छैन,’ उनले भने, ‘गठबन्धनको सरकार हो । सबैलाई मिलाएर लाने जिम्मेवारी हो । तर, सुशासन, सामाजिक न्याय, विकास निर्माणको क्षेत्रमा भएका कामले सरकार सफल छ ।’
सरकारले सामाजिक न्याय, मिटरब्याज पीडितको मुद्दा सम्बोधन, नागरिकता समस्याको समाधान, भ्रष्टाचारविरुद्ध सुशासनको पक्षमा र अन्तर्राष्ट्रिय सम्बन्ध विस्तारमा ऐतिहासिक काम भएको दाबी गरे ।
आफ्नो पार्टीको नामबाट कम्युनिष्ट हटाउन लागेको भन्ने चर्चा सही नभएको भन्दै प्रचण्डले माओवादी केन्द्रको सट्टामा समाजवादी केन्द्र हुनसक्ने बताए ।
प्रचण्डले एनसेल काण्डमा पर्याप्त तथ्य तथ्याङ्कसहित आफूले संसदीय समितिमा कुरा राखिसकेको बताउँदै विधि, विधान र कानुनभन्दा माथि कसैलाई पनि छुट नहुने बताए ।
