विराटनगर । कोसी प्रदेशका पर्यटन, वन तथा वातावरणमन्त्री गणेश उप्रेती ‘सुशील’ ले प्रदेश नामकरणका विषयमा आन्दोलनरत पहिचान पक्षधरलाई चाँडै नामको छिनोफानो हुने बताएका छन् ।
बिहीबार मोरङ केराबारी गाउँपालिका–३ मा आयोजित ख्रीष्टमसको शुभकामना आदान–प्रदान कार्यक्रमलाई सम्बोधन गर्दै मन्त्री उप्रेतीले यस्तो बताएका हुन् ।
कार्यक्रमस्थल जानेक्रममा अवरोधको स्थिति बनाउन प्रयासरत टोलीप्रति इङ्गित हुँदै मन्त्री उप्रेतीले भने, ‘पुनः नामकरण हुनुपर्छ भन्दै केही साथीहरूले आज बाटैमा आफ्ना माग राख्नुभयो । हामीले नाम र पहिचानको विषय वार्तामार्फत चाँडै नै टुङ्ग्याउने भनिरहेकै छौं भने तपाईंहरूले किन धैर्यता गर्न सक्नुभएको छैन ?’
दुईतिहाई सांसदको समर्थनमा संसदबाट प्रदेशको नाम पारित गरेको भए पनि पुनः दुईतिहाई मत ल्याएर प्रदेश नामकरण गर्न सकिने उनको भनाइ छ ।
मन्त्री उप्रेतीले वर्तमान प्रदेश सरकार कठिन परिस्थितिबाट बनेको बताउँदै सम्भव भएसम्म सदनबाटै यसको हल निकाल्ने बताए ।
आफूले संसद नियमावलीमा दुईतिहाई सांसदले प्रदेशको नाम परिवर्तन गर्न चाहेमा उक्त प्रावधान पनि राखिनुपर्ने भनेर प्रस्ताव दर्ता गराएको उनको भनाइ छ ।
आफूले धर्मनिरपेक्षता, सङ्घीयता र पहिचानपहिचानकै पक्षमा लडेर आएको स्मरण गराउँदै मन्त्री उप्रेतीले आफूहरूलाई पहिचानविरोधी भनेर आशङ्का नगरिदिन आग्रह गरे ।
‘यो सरकार अहिले निकै विशिष्ट अवस्थामा बनेको छ, अहिलेसम्म मन्त्रीमण्डलले समेत पूर्णता पाउन सकेको छैन,’ उनले थपे, ‘धैर्यता राख्नुस्, सरकारलाई पूर्ण हुन दिनुहोस्, सरकारलाई अगाडि बढ्न दिनुहोस् । अङ्कगणित र एउटा कठिनाइका कारण यो नाम रहन गयो । अब सहमति कायम गरेर यसलाई परिवर्तन गर्न सकिन्छ ।’
‘हामी पनि पहिचानकै पक्षमा छौं, पहिचान, सङ्घीयता, गणतन्त्र र धर्मनिरपेक्षताका लागि लडाइँ लडेर आएका हौं,’ उनले थपे, ‘हामी पहिचानविरोधी होइनौं । हामीलाई शङ्का नगरिदिनुहोला । तपाईंहरूको आन्दोलनको पक्षमा हामी छौं ।’
सरकार समृद्धिको सपना बोकेर अगाडि बढिरहेको बताउँदै उनले यस काममा सबैले हातेमालो गरे अघि बढ्नुपर्ने उनले सुझाए ।
यस्तै, मन्त्री उप्रेतीले नेपाल धर्मनिरपेक्ष मुलुक भएकाले सबै धर्मप्रति समान आदर गर्नुपर्ने बताउँदै धर्मनिरपेक्षताको पक्षमा अहिलेको संविधान र वर्तमान सरकार रहेको बताएका छन् ।
