नेपाली कांग्रेसले आगामी बुधबार संसदीय दलको नेता छान्न निर्वाचन गर्ने भएको छ ।
पुस ६ गते बुधवार बिहान संसदीय दलको नेताका लागि चुनाव गरिने कांग्रेसले जनाएकाे हो ।
कांग्रेस संसदीय दलको निर्वाचन समितिले बुधबार बिहान ८ बजेदेखि सुरु गर्ने गरी चुनावको मिति तोकेको छ ।
आइतबार बसेको केन्द्रीय कार्यसम्पादन समितिको बैठकले सहमहामन्त्री भीष्मराज आङ्दम्बेको नेतृत्वमा तीन सदस्यीय निर्वाचन समिति गठन गरेको थियो । समितिले सोमबार नै मतदाता नामावली प्रकाशन गर्ने जनाएको छ ।
कांग्रेसमा संसदीय दलको चुनावमा प्रतिनिधि सभाका सांसद मतदाता हुने व्यवस्था छ ।
कांग्रेस संसदीय दलको नेतामा सभापति शेरबहादुर देउवा, नेता शेखर कोइराला र महामन्त्री गगन थापाको उम्मेदवारी रहने सम्भावना छ ।
कांग्रेसको संस्थापन पक्षबाट देउवा मात्रै उम्मेदवार बन्दा संस्थापनबाहिरको पक्षबाट कोइराला र थापा प्रतिस्पर्धामा जाने सम्भावना रहेको कांग्रेस नेताहरूले बताएका छन् ।
संसदीय दलकाे नेताका लागि थापाले निर्वाचनअघि बाट नै दाबी गर्दै आएका थिए । तर औपचारिक रुपमा आफ्नो दाबी प्रस्तुत नगरिसकेका कोइरालाको घुमाउरो कदमले कांग्रेसको संसदीय दलको नेताको निर्वाचनलाई थप रोमाञ्चक बनाएको छ ।
