नेपाल औषधी बिक्रि तथा प्रतिनीधि सङ्घ (एनएमएसआरए) विराटनगर इकाइले आज १३३ औँ अन्तर्राष्ट्रिय मजदुर दिवस मनाएको छ ।
दिवसका अवसरमा सङ्घले विराटनगर बजारमा प्रभात फेरि गरेर कार्यक्रमको सुरुआत गरेको थियो। शहिद रङ्गशालाबाट सुरू गरिएकाे प्रभात फेरि अस्पताल चोक, जलजला चोक, गोल्छा चौक, माेरङ्ग जिल्ला प्रशासन कार्यालय चोक हुँदै पुन: कार्यालय पुगेर सकिएकाे थियो।
मजदुरहरु एक हुनुपर्ने सन्देश प्रवाह गर्न एवम् मजदुरको हकअधिकार सुनिश्चितताका लागि र्याली निकालिएको सङ्घका सचिव दिपेन्द्र कार्किले द शब्द एक्सप्रेसलाई जानकारी दिए ।
प्रत्येक वर्ष मे १ तारिखका दिन विश्वभर अन्तर्राष्ट्रिय श्रमिक दिवस मनाइने चलन छ ।
हरेक वर्ष दिवसमा संस्थाले मोटरसाइकल र्याली लगायत कार्यक्रमहरु आयोजना गर्ने गरेको थियाे तर विद्यमान इन्धन अभावकाे समस्यालाई ध्यानमा राख्दै पैदल र्याली आयोजना गरेकाे संस्थाका अध्यक्ष प्रमोद साहले बताए ।
‘एनएमएसआरएमा झण्डै ४०० सदस्य आबद्ध छन, प्रत्येक सदस्यहरुले पेशागत रुपले नियमित्त यात्रा गर्नुपर्ने हुन्छ, पेट्राेलकाे अभाव हुँदा कस्ताे हुन्छ भन्ने हामीले भाेगेका छाैँ’ अध्यक्ष साहले भने, ‘त्यसैले अहिलेकाे परिस्थितीमा मितव्ययी हुने विभिन्न उपायहरूबारे संस्थाले केहि महिनादेखि पहल गर्दै आइरहेको छ । आजकाे पैदल प्रभात फेरी पनि त्यसैकाे उपज हाे ।’
र्याली पछि संस्थाले आयोजना गरेको औपचारिक कार्यक्रममा मजदुर दिवसको इतिहास र औचित्य तथा मजदुर हक-अधिकारका कुराहरुबारे छलफल गरिएकाे थियो।
साथै, कार्यक्रममा एनएमएसआरए र इन्स्टेन्ट ब्लड डाेनर (आइबिडी)बीच रगत अभाव हल गर्न सक्ने सहकार्य गर्ने सहमति समेत भएकाे छ ।
संस्थाका अधिकतम सदस्यहरु नियमित रक्तदाता रहेकाले आवश्यक परेको बेला संस्थागत रुपमै पहल गरेर रक्तदाता उपलब्ध गराउने प्रतिबद्धताका साथ, बिरामी र रक्तदाता बिच समन्वय गरि रक्तदान गराउँदै आएकाे आइबिडीबीच सहकार्य गर्ने घोषणा गरिएकाे आइबिडीका संयाेजक सुरेन्द्र मल्लले जानकारी दिए ।
कार्यक्रमकाे अन्त्यमा विशिष्ठ अतिथि तथा प्रा.डा. अजय भट्टराईले पेशागत तनाव व्यवस्थापन गरि कसरी सफलता हासिल गर्न सकिन्छ भन्ने विषयमा संस्थाका सदस्यहरुसँग अन्तरक्रिया गरेका थिए ।
