नेपाली राष्ट्रिय फुटबल टोली मैत्रीपूर्ण फुटबलमा थाइल्यान्डको शीर्ष डिभिजन क्लब चोनबुरी एफसीसँग पराजित भएको छ ।
चोनबुरी स्टेडियममा आइतबार भएको खेलमा नेपाल चोनबुरीसँग ३–१ गोलले पराजित भयो ।
नेपालका दर्शन गुरुङले सान्त्वना गोल फर्काएका थिए ।
पहिलो हाफमा एक गोल गरेको चोनबरीले दोस्रो हाफमा अरू दुई गाेल गर्याे । नेपालका लागि ८३ औँ मिनेटमा दर्शन गुरुङले एक गोल गरे ।
नेपालले एएफसी एसियन कप छनोटको तयारीका लागि थाइल्यान्डको शीर्ष क्लबसँग मैत्रीपूर्ण अभ्यास खेल खेलेको हो ।
नेपाली टोलीले बिहीबार थाइल्यान्डको राष्ट्रिय टोलीसँग पनि अन्तर्राष्ट्रिय मैत्रीपूर्ण फुटबल खेलेको थियो ।
नेपाल थाइल्यान्डसँग २–० गोलले पराजित भएको थियो ।
त्यसअघि नेपालले माघ १५ गते र माघ १८ गते अफ्रिकी राष्ट्र मौरिसससँग खुई मैत्रीपूर्ण खेल खेलेको दुवै खेलमा नेपालले समान १–० को जित निकालेको थियो ।
एएफसी एसियन कप छनोट खेलमा नेपाल समूह ‘ए’ मा छ ।
समूहमा नेपालसहित कुवेत, जोर्डन र इन्डोनेसिया छन् ।
नेपालका लागि यो समूह तुलनात्मक रुपमा निकै कठिन समूह हो ।
समूह चरणको खेल जुन ८ देखि १४ सम्म कुवेतमा आयोजना हुनेछ ।
एएफसीले छनोटमा सहभागी २४ देशलाई ६ समूहमा विभाजन गरेको छ ।
प्रत्येक समूहको शीर्ष टोली र पाँच उत्कृष्ट दोस्रो टोली सन् २०२३ मा चीनमा आयोजना हुने एसिया कपमा छनोट हुनेछन् ।
