१५औं संस्करणको इन्डियन प्रिमियर लिग (आईपिएल)को पहिलो खेलमा चेन्नई सुपर किङग्स (सिएसके) पराजित भएको छ ।
भारतस्थित वान्खडे रङ्गशालामा सम्पन्न आईपिएलको पहिलो खेलमा सिएसके कलकता नाइट राइडर्स (केकेआर)सँग ६ विकेटले पराजित भएको हो ।
टस जितेको केकेआरले पहिले फिल्डिङ गर्ने निणर्य लिएको थियो ।
टस हारेर ब्याटिङ सुरू गरेको सिएसकेको सुरुवात गतिलो हुन सकेन । आफ्ना दुई ओपनरलाई तीन रनमा गुमाएको सिएसकेको लागि महेन्द्रसिंह धोनीले सर्वाधिक रन बनाए ।
सातौं नम्बरमा ब्याटिङ गर्न आएका धोनीले ३८ बलको सामना गर्दै सात चौका र एक छक्काको मद्दतमा अर्धशतक (५०) बनाउँदै अविजित रहे ।
धोनीबाहेक रोबिन उथाप्पाले २८, रविन्द्र जडेजाले २६ र अम्बिती रायडुले १५ रनको योगदान सिएसकेलाई दिए ।
यी चारबाहेक सिएसकेका अन्य तीन ब्याटरले मात्र ६ रन बनाउन सके ।
केकेआरका लागि उमेश यादवले सर्वाधिक दुई विकेट लिए । केकेआरका वरुण चक्रवर्ती र आन्द्रे रसेलले समान एक-एक विकेट लिए ।
धोनीले अर्धशतक बनाएर टोलीलाई सम्मानजनक योगफलसम्म पुर्याए पनि केकेआरका ब्याटर खेल जिताउन सफल भए ।
केकेआरका लागि ओपनर अजिन्का राहेणेले ४४ रनको योगदान दिए । राहेणेले सर्वाधिक रन बनाउँदा साम विल्ङ्सिले २५, नितिश रानाले २१ र वेन्कटेस ऐयरले १६ रन बटुले ।
जवाफी इनिङमा अविजित रहेका केकेआरका कप्तान श्रेयस आयरले २० र सेल्डन ज्याक्सनले तीन रन बनाउँदै टोलीलाई जारी संस्करणको पहिलो खेलमा नै दुई अङ्क बटुल्न सहयोग गरे ।
सिएसकेका लागि ड्वेन ब्राभोले तीन विकेट लिए पनि टोलीलाई जित दिलाउन असफल भए । त्यसबाहेक मिचेल सान्टनरले एक विकेट लिए पनि सिएसकेका अन्य चार बलर विकेटविहीन रहे ।
आज खेलमा सिएसकेविरुद्ध जित दर्ता गरेसँगै केकेआरले १४औं संस्करणको फाइनलमा भोगेको हारको बदला लिएको छ ।
दुबई अन्तर्राष्ट्रिय क्रिकेट रङ्गशालामा भएको आइपिएल २०२१को फाइनलमा सिएसकेले केकेरआरलाई २७ रनले हराउँदै उपाधि चुमेको थियो ।
जारी आईपिएलमा भोलि दुई खेल हुँदैछन् ।
पहिलो खेल दिल्ली क्यापिटल्स र मुम्बई इन्डियन्सबीच हुनेछ भने दोस्रो खेल पन्जाब किंग्स र रोयल च्यालेन्जर्स बैङ्गलोरबीच हुँदैछ ।
