शरीरको भित्री अङ्ग, रगत नली तथा टिश्युमा हुने समस्या आएमा पनि भिडियो एक्स-रे (अलट्रासाउण्ड वा युएसजी) गर्न सल्लाह दिइन्छ ।
यसबाहेक गर्भावस्थामा भिडियो एक्स-रेको विशेष प्रयोग हुनेगर्छ । गर्भावस्थामा भिडियो एक्स-रे गर्नु नहुने भन्ने भ्रम समजमा व्यापक रुपमा फैलिएको पाइन्छ ।
मानिसहरूमा एक्स-रेमा भएको विकिरणले शरिरलाई हानि हुनसक्छ भन्ने बुझाइ बढेको छ । जसकारण भिडियो एक्स रे धेरै पटक गर्दा क्यान्सर हुने, बाझोपन निम्त्याउँन सक्ने भनेर सुनेको कारण समाजमा भिडियो एक्सरेसँग सम्बन्धित पनि भ्रम फैलिएको हुनसक्छ ।
युएसजीलाई भिडियो एक्स-रे भनिने हुदा यसले बच्चामा असर गर्छ भन्ने भ्रम पैदा हुनु समान्य रहेको विराट मेडिकल कलेज तथा शिक्षण अस्पतालमा कार्यरत स्त्री रोग तथा प्रसूति विशेषज्ञ सिद्धार्थ कुमार यादव बताउँछन् । उनका अनुसार भिडियो एक्स-रेबाट अन्यको जस्तो विकिरण नआउने हुदा यसले आमा र बच्चामा कुनै पनि प्रकारको असर गर्दैन ।
गर्भावस्थामा जति पटक सम्म युएसजि गराएपनि सेफ नै हुने र यसले बच्चालाई असर नगर्ने डा. यादवको भनाइ छ । गर्भावस्थामा बच्चाको स्थिति थाहा पाउन भिडियो एक्स-रे गरिन्छ । डा. यादवका अनुसार गर्भावस्थामा कम्तिमा पनि तिनपटक सम्म भिडियो एक्सरे गर्नु पर्छ ।
पहिलो भिडियो एक्सरेबाट बच्चा गर्भमा बसेको वा नबसेको हेर्न, गर्भ बसेको कति हप्ता भएको, गर्भमा कति वटा बच्चा छ र डेलिभरी हुने अपेक्षित मिति थाहा पाउन सकिन्छ । त्यसपछि दोस्रो त्रैमासिक अर्थात् १८ देखि २२ हप्तामा एनोमली स्क्यान गर्नुपर्ने हुन्छ ।
एनोमली स्क्या बाट बच्चाको अवस्था, शारीरिक बनावटमा खराबी भए नभएको, बच्चाको सम्पुर्ण शारीरिक र दिमागी अवस्था तथा जन्मजात रोग पत्ता लगाउँनका लागी गरिन्छ ।
साथै, अन्तिम तिन महिना वा तेस्रो त्रैमासिकमा सालको पोजिसन हेर्न, बच्चा बसेको पोजिसन हेर्न (उल्टो बसेको वा सुल्टो), आमाको शरीरमा हुने एम्निओटिक फ्ल्युड (बच्चा हुर्किन चाहिने तरल पदार्थ)को मात्रा हेर्न र डेलिभरीको बेला हुनसक्ने जटिलता पत्ता लगाउन भिडियो एक्स रे गरिन्छ ।
यी उल्लेखित कारण वा समय भन्दा अरु कारण वा आमा र बच्चामा केहि समस्या भएमा पनि भिडियो एक्स-रे गर्न आवश्यक हुनसक्ने डा. यादवको भनाइ छ ।
