मोरङको लेटाङ ५, खेरुवा वरपरको क्षेत्रमा सोमबार बिहान ७ बजेदेखि अर्को आदेश जारी नहुन्जेल सम्मका लागि जिल्ला प्रशासन कार्यालय मोरङले कर्फ्यू लगाएको छ ।
एक महिला प्रहरीको ज्यान जानेगरी भएको आइतबारको झडपपछि स्थिति तनावपूर्ण बनेकाले लेटाङमा कर्फ्यू आदेश जारी गरिएको प्रमुख जिल्ला अधिकारी काशीराज दाहालले जानकारी दिए ।
सोमबार आदेश जारी गर्दै उनले पूर्वमा मोरङ्गे खोला क्षेत्र, पश्चिममा चिसाङ खोला क्षेत्र, उत्तरमा ६ नम्बर वडा कार्यालय क्षेत्र र लेटाङ वडा ३ र ४ को पश्चिम गङ्गे चोक र कमलपुर क्षेत्रमा अनिश्चितकालिन कर्फ्यू लगाइएको जनाए ।
विद्यार्थीमाथि यौन दुर्व्यवहार गरेको अभियोग लागेका शिक्षकलाई पक्राउ गर्न आइतबार खटिएको प्रहरी टोलीमाथि नै आक्रमण भएको थियो ।
यौन दुर्व्यवहार आरोपी लेटाङ नगरपालिका– ५ को का शिक्षक मनोज पौडेललाई पक्राउ गर्न पुगेको प्रहरी टोलीमाथि आक्रमण हुँदा प्रहरी जवान उर्मिला श्रेष्ठको मृत्यु भएको थियो ।
विद्यालयभित्रै लुकेर बसेका आरोपित शिक्षक पौडेललाई भने प्रहरीले नियन्त्रणमा लिएको छ ।
यसरी भएको थियो घटना
मोरङको लेटाङ नगरपालिका–५ शिक्षा विकास माध्यमिक विद्यालयमा अध्ययनरत १३ वर्षीया छात्रामाथि याैन दुर्व्यवहार भएको भन्दै विद्यार्थीहरूले आन्दोलन थालेका थिए ।
कक्षा ७ मा अध्ययनरत छात्रामाथि करणीको प्रयास गरेको भन्दै आइतबार विद्यार्थीहरूले विद्यालयमा आगजनी र तोडफोड गरे ।
होलीको दिन (शुक्रबार) ५६ वर्षीय शिक्षक मनोज पौडेलले बालिकाको घरमै गएर करणी प्रयास गरेको उनीहरूको आरोप थियाे ।
घरमा कोही नभएको मौकामा पुगेका शिक्षक पौडेलले जवरजस्ती प्रयास गर्दा किशोरी चिच्याएपछि उनी त्यहाँबाट भागेको स्थानीयले बताएका छन् ।
लेटाङ –३ घर भएका शिक्षक पौडेल सोही विद्यालयका निमावि तहका सामाजिक शिक्षक हुन् ।
यसअघिसमेत पौडेललाई अभिभावक र विद्यालय प्रशासनले यस्ता घटना नगर्न चेतावनी दिएका थिए ।
तर शिक्षक पौडेलमाथि पटकपटक आरोप लाग्दासमेत कारबाही नभएको भन्दै आइतबार विद्यार्थीले आक्रोशित बने ।
आक्रोशित विद्यार्थीले शिक्षक पौडेलको को २७ प १९२१ नम्बरको मोटरसाइकलमा आगजनी गरेका थिए ।
विद्यार्थीले विद्यालय परिसरमा आक्रोश व्यक्त गरेपछि आरोपित शिक्षकलाई प्रहरीको सुरक्षा घेरामा राखिएको थियो ।
विद्यार्थी आक्रोशित भएपछि प्रहरीले मे १ च ६६२ नम्बरको एम्बुलेन्समा हालेर शिक्षकलाई उद्धार गरेको थियो ।
आरोपित शिक्षकलाई उद्धार गर्न एम्बुलेन्स ल्याएको भन्दै विद्यार्थीले एम्बुलेन्समा समेत ढुङ्गामुढा गरे ।
जसक्रममा प्रहरी जवान रेणु यादव र उर्मिला श्रेष्ठ घाइते बने । घाइते श्रेष्ठको अस्पताल लैजाँदै गर्दा मृत्यु भयो ।
घटनामा ज्यान गुमाएकी प्रहरी जवान श्रेष्ठकाे घाँटीमा चक्कु प्रहार भएकाे बताइएकाे छ ।
राती घटेकाे उक्त घटनामा परी घाइते भएका २ दर्जन बढीकाे उपचार माेरङ्गका विभिन्न अस्पतालमा भइरहेकाे छ ।
माेरङ्ग प्रशासनले कर्फ्यू जारी गरेसँगै यतिबेला लेटाङ क्षेत्रकाे स्थिती सामान्य रहेकाे छ ।
