अमेरिकामा गरिएको अध्ययनले अग्लो महिलामा क्यान्सरको जोखिम उच्च हुने देखाएको छ ।
अमेरिकी जर्नल क्यान्सर एपिडेमिलोजीमा प्रकाशित अध्ययनले अन्य मानिसको तुलनामा अग्लो महिलामा क्यान्सरको जोखिम बढी हुने पत्ता लगाएको हो ।
शोधकर्ताले प्रत्येक अतिरिक्त १० सेन्टिमिटर उचाइले क्यान्सरको जोखिम १३ प्रतिशत बढीसँग जोडिएको पत्ता लगाएका हुन् । अध्ययनका लागि शोधकर्ताहरूले ५० देखि ७९ वर्ष उमेरका करिब एक लाख ४५ हजार मेनोपज भइसकेका महिलाहरूको विश्लेषण गरेका थिए ।
१२ वर्षसम्म क्यान्सर नभएका महिलाहरूको अध्ययन गरिएको थियो । अनुसन्धानकर्ताले स्तन, कोलोन, एन्डोमेट्रियम, किड्नी, अण्डाशय, मलाशय, थाइरोइड साथै मल्टिपल माइलोमा र मेलेनोमाको क्यान्सर हुने सम्भावना र उचाइबीचको सम्बन्ध पत्ता लगाएका थिए ।
केही क्यान्सरले अग्ला महिलामा क्यान्सरको जोखिम अझ बढाएको देखिन्छ । किड्नी, मलाशय, थाइरोइड र रगतलगायतका क्यान्सर प्रत्येक १० सेन्टिमिटरभन्दा बढी उचाइ भएका महिलामा २३ देखि २९ प्रतिशत बढी जोखिम हुने अध्ययनमा उल्लेख छ ।
क्यान्सर विकाससँग सम्बन्धित प्रक्रियाको परिणाम रहेको न्यूयोर्कको येसिभा विश्वविद्यालयको अल्बर्ट आइन्स्टाइन कलेज अफ मेडिसनका वरिष्ठ महामारीविद् तथा अध्ययनका मुख्य लेखक जेफ्री कबट बताउँछन् ।
उनका अनुसार हर्मोन वा उचाइलाई असर गर्ने अन्य वृद्धि कारकले पनि क्यान्सरको जोखिमलाई असर गर्न सक्छ । उचाइका साथै उमेर, तौल, शिक्षा, धुम्रपान गर्ने बानी, रक्सीको सेवन र हर्मोन थेरापी जस्ता क्यान्सरलाई असर गर्ने कारकहरूले क्यान्सरको जोखिमलाई थप बढाउने गर्छ
– अल्जजिरा
