चैत महिना सुरु भएसँगै रङहरूको पर्व होलीको रौनक बढिरहेको छ ।
यस वर्ष चैत ३ गते पहाडमा र चैत ४ गते तराईमा होली पर्व मनाइँदै छ ।
होली नजिकिएसँगै बजारमा होलीमा आवश्यक सामग्रीहरूको व्यापार बढ्छ ।
पछिल्ला दुई वर्ष कोरोना भाइरस (कोभिड–१९) महामारीका कारण होलीमा व्यापार हुन सकेको थिएन ।
यस वर्ष व्यापार बढ्ने आँकलन गरिएको भए पनि अपेक्षाअनुरूप व्यापार नभएको व्यापाहरीहरूको दुखेसो छ ।
शुक्रबार तराईमा होली पर्व हुने भएकाले त्यसको तयारीका लागि फाट्टफुट्ट ग्राहकहरू बजारमा देखिन्छन् ।
तर बजार भने उत्साहजनक नरहेको विराटनगरका व्यापारीहरू बताउँछन् ।
विगत दुई वर्षयता यस वर्ष कोभिड सङ्क्रमणको दर घटेका कारण मानिसमा हाेलीकाे राैनक बढे पनि व्यापार बढ्ने आशमा बसेका व्यापारीहरू यस पटक पनि निराश देखिएका छन् ।
पसलमा ‘ह्याप्पी होली’, ‘बुरा नमानो होली है’ लेखिएका टिसर्ट तथा पिचकारी र रङ बेच्न बसेका व्यापारीहरू दोकानलाई होली लागे पनि ग्राहकहरू भने खासै नरहेको बताउँछन् ।
गत वर्ष होलीकै लागि भनेर किनेको सामग्री नबिकेपछि गोदाममा रहेका सोही सामग्री बेचेको उनीहरू बताउँछन् ।
यस वर्ष होली सामग्रीको दाम पनि बढेर आएका कारण पुराना सामानलाई केही दाम बढाएर बेच्नु परेको उनीहरूको भनाइ छ ।
यता, होली विशेष सामग्री किन्न बजार आएकाहरू पनि दाम आकाशिएको बताउँछन् ।
विगतका वर्षहरूको तुलनामा सबै सामग्रीको दाम अचाक्ली बढेको उनीहरूको तर्क छ ।
कोरोना सङ्क्रण दर घटेका कारण निस्फिक्री रूपमा होली खेल्ने तयारी उनीहरूको छ ।
तस्बिरमा हाेली २०७८
