सत्ता गठबन्धनको आइतबार बिहान बसेको बैठकमा मिलिनियम च्यालेन्ज कर्पोरेसन (एमसीसी) व्याख्यात्मक टिप्पणीसहित संसदबाट अनुमोदन गर्नेमा सहमत जुटेको छ । एमसिसी आजै पारित हुने बताइएकाे छ ।
एमसिसी संसदबाट अनुमोदन गर्ने निर्णय भएको नेपाली काङ्ग्रेसका वरिष्ठ नेता रामचन्द्र पौडेलले बताए ।
उनका अनुसार सत्ता गठबन्धनको सबै दलमा एमसिसीमा शङ्का रहेका विषयमा टिप्पणी गर्दै सहमति जुटेको हो ।
बैठकपछि पत्रकारसँग बोदै पौडेलले एमसिसी नेपालको संविधानअनुरुप लागू हुने पनि बताए ।
यो विशुद्ध विकास परियोजना भएको र अमेरिकाको सैन्य रणनीति नभएको उनको भनाइ छ ।
‘व्याख्यात्मक टिप्पणीमा याे इन्डोप्यासिफिक रणानीतिअन्तर्गतकाे हाेइन र याे नेपालमा नेपालकाे संविधान नै सर्वाेपरी हुन्छ र यसलाई विकास सहयाेग हाे भन्ने मात्र हामी बुझ्छाैँ,’ उनले भने ।
यसै कुरा समावेश गरी साे बारेकाे छलफलपछि एमसिसीकाे दस्तावेजसँग राखेर सरकारले पेस गर्ने र त्यसलाई अनुमाेदन गरिने उनको भनाइ छ ।
पहिलाे सत्रमा छलफल हुने र दाेस्राे सत्रमा पारित हुने पाैडेलले बताए ।
यसअघि नै सत्ता साझेदार दल नेकपा माओवादी केन्द्रले व्याख्यात्मक टिप्पणीसहित एमसिसी अनुमोदन गर्ने निर्णय गरेको थियो ।
आइतबार (आज) बिहान पार्टी अध्यक्ष पुष्पकमल दाहाल ‘प्रचण्ड’ को निवास खुमलटारमा बसेको पूर्व स्थायी कमिटी बैठकले एमसिसी अनुमोदन गर्ने निर्णय गरेको हो ।
पार्टी बैठक सकेर अध्यक्ष प्रचण्ड सत्ता गठबन्धनको बैठकका लागि प्रधानमन्त्री निवास बालुवाटार पुगेका थिए ।
अब, आज दिउँसो १ बजे बस्ने संसद् बैठकमा एमसिसीमाथि छलफल हुने कार्यसूची छ ।
शनिबार सार्वजनिक भएको सम्भावित कार्यसूचीअनुसार एमसिसीमाथि छलफल हुने छ ।
एमसिसीको प्रस्ताव अर्थमन्त्री जनार्दन शर्माले प्रस्तुत गर्ने छन् ।
यसअघि प्रधानमन्त्री देउवाको आग्रहमा बिहीबारका लागि तोकिएको बैठक शुक्रबार दिउँसो १ बजेका लागि सारिएको थियो ।
शुक्रबारको बैठकअघि एमसिसीको विषयमा सहमति नभएपछि बैठक आइतबारका लागि सारिएको हो।
