सत्ता साझेदार दल नेकपा माओवादी केन्द्रले व्याख्यात्मक टिप्पणीसहित अमेरिकी सहयोग निकाय मिलेनियम च्यालेन्ज कर्पोरेसन (एमसिसी) अनुमोदन गर्ने निर्णय गरेको छ ।
आइतबार (आज) बिहान पार्टी अध्यक्ष पुष्पकमल दाहाल ‘प्रचण्ड’ को निवास खुमलटारमा बसेको पूर्व स्थायी कमिटी बैठकले एमसिसी अनुमोदन गर्ने निर्णय गरेको हो ।
पार्टी बैठक सकेर अध्यक्ष प्रचण्ड प्रधानमन्त्री निवास बालुवाटार पुगेका छन् ।
त्यहाँ सत्ता गठबन्धनको बैठक बस्दै छ ।
सत्ता गठबन्धनमा रहेका राष्ट्रिय जनमोर्चाबाहेक नेपाली काङ्ग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टीका शीर्ष नेताबीच एमसिसी अनुमोदनमा सहमति जुटिसकेको छ।
आज दिउँसो १ बजे बस्ने संसद् बैठकमा एमसिसीमाथि छलफल हुने कार्यसूची छ ।
शनिबार सार्वजनिक भएको सम्भावित कार्यसूचीअनुसार एमसिसीमाथि छलफल हुने छ ।
एमसिसीको प्रस्ताव अर्थमन्त्री जनार्दन शर्माले प्रस्तुत गर्ने छन् ।
यसअघि प्रधानमन्त्री देउवाको आग्रहमा बिहीबारका लागि तोकिएको बैठक शुक्रबार दिउँसो १ बजेका लागि सारिएको थियो ।
शुक्रबारको बैठकअघि एमसिसीको विषयमा सहमति नभएपछि बैठक आइतबारका लागि सारिएको हो।
