आईसिसी टी२० ग्लोबल क्वालिफायरको सेमिफाइनलमा पुगेको नेपाली राष्ट्रिय क्रिकेट टोलीलाई प्रधानमन्त्री शेरबहादुर देउवाले बधाई ज्ञापन गरेका छन् ।
सामाजिक सञ्जालमार्फत दिइएको उक्त बधाईमा प्रधानमन्त्री देउवाले टी२० विश्वकपमा स्थान बनाउन समेत नेपाली टोलीलाई शुभकामना दिएका छन् ।
समाजिक सञ्जालमा प्रधानमन्त्री देउवाले लेखेका छन्, ‘भोलि हुने सेमिफाइनलमा पनि विजयी हुँदै नेपाललाई विश्वकपमा छनोट गराउन सफल हुनुहुनेछ भन्ने सुवेच्छा सहित सम्पूर्ण टिमलाई शुभकामना व्यक्त गर्दछु।’
उनले त्यसअघि लेखेका छन्, ‘टि२० विश्वकप ग्लोबल छनोटको सेमिफाइनल प्रवेश गर्न सफल नेपाली राष्ट्रिय क्रिकेट टिमलाई हार्दिक बधाई।’
ओमानस्थित अल अमेरत क्रिकेट रङ्गशालामा आज भएको खेलमा क्यानडालाई आठ विकेटले पराजित गर्दै नेपालले आईसिसी टी२० ग्लोबल क्वालिफायरको सेमिफाइलनमा स्थान पक्का गरेको थियो ।
नेपाल सम्मिलित क्वालिफायरको समूह ‘बी’मा ओमान, क्यानडा र फिलिपिन्स रहेका थिए ।
आफूले खेलेका तीनै खेलमा शतप्रतिशत जित निकाल्दै नेपालले सेमिफाइनलमा आफ्नो स्थान पक्का गरेको हो ।
भोलि हुने पहिलो सेमिफाइनलमा यूएईलाई पराजित गर्दै फाइनल प्रवेश गर्न सके यहीँ वर्षको अक्टोबरमा अस्ट्रेलियामा आयोजना हुने टी२० विश्वकपमा नेपालले आफ्नो स्थान सुरक्षित गर्नेछ ।
