सर्वाधिक धेरै पटक इङ्ग्लिस प्रिमियर लिग फुटबलको उपाधि जितेको म्यानचेस्टर युनाइटेड रेलिगेसन जोनमा रहेको बर्नलीसँग बराबरीमा रोकिएको छ ।
मङ्गलबार राति बर्नलीको मैदानमा भएको सो खेलमा १-१ को बराबरीमा रोकिएपछि युनाइटेडले अङ्क बाँडेको छ ।
बर्नलीको घरेलु मैदानमा सुरुआती अग्रता बनाए पनि युनाइटेडले त्यसलाई जोगाउन नसक्दा शीर्ष चारमा उक्लिने मौका गुमाएको हो ।
पल पोग्वाले १८औँ मिनेटमा गरेको गोलसँगै युनाइटेडले अग्रता बनाएको थियो ।
तर घरेलु टोलीका जय रोड्रिगुयजले ४७औँ मिनेट बराबरी गोल गर्दै टोलीको सङ्कट टारे ।
खेलको दोस्रो हाफको ६८औँ मिनेट क्रिस्टियानो रोनाल्डो मैदान प्रवेश गरेपनि कुनै जादु देखाउन सकेनन् ।
बराबरीपछि युनाइटेड २३ खेलबाट ३९ अङ्कसहित पाँचौँ स्थानमा छ ।
बर्नली भने २० खेलबाट १४ अङ्क जोडेर पुछारमा रहेको छ ।
गएराति नै भएको खेलमा न्युक्यासल युनाइटेडले एभर्टनलाई ३-१ गोलले हरायो ।
अर्को खेलमा वेस्ट ह्याम युनाइटेडले वाट्फोर्डलाई १-० ले पराजित गर्दै शीर्ष चारमा उक्लियो ।
लिगमा २३ खेलबाट ५७ अङ्कसहित म्यान्चेस्टर सिटी शीर्ष स्थानमा छ ।
