भारतीय राष्ट्रिय पुरुष क्रिकेट टोलीले एकदिवसिय क्रिकेटमा कीर्तिमान कायम गरेको छ ।
एकदिवसिय क्रिकेटमा सर्वाधिक खेल खेल्दै भारतले नयाँ इतिहास रचेको हो ।
अहमदाबादस्थित नरेन्द्र मोदी क्रिकेट रङ्गशालामा हिजो सम्पन्न वेस्ट इन्डिजविरुद्धको खेलसँगै भारत एक हजार एकदिवसिय खेल खेल्ने पहिलो राष्ट्र बनेको हो ।
आफ्नो १०००औं खेलमा वेस्ट इन्डिजविरुद्ध ६ विकेटको जित दर्ता गर्दै भारतले ऐतिहासिक उपलब्धीलाई थप अविस्मरणीय बनाएको छ ।
तीन एकदिवसीय श्रृङ्खला खेल्न भारत आएको वेस्ट इन्डिज पहिलो खेलमा भारतसँग पराजित भएको थियो ।
भारतको जितमा युजवेन्द्र चहाल, वासिङ्गटन सुन्दर, रोहित शर्मा र सूर्य कुमार यादव नायक बने ।
एक हजार एकदिवसिय खेल खेलेको भारतले पाँच सय १८ खेलमा जित निकालेको छ ।
त्यस्तै, चार सय ३१ खेलमा पराजय भोगेको भारतले नौ खेलमा बराबरीको नतिजा आत्मसाथ गरेको छ ।
भारतले खेलेका ४१ एकदिवसिय खेल विविध कारणले नजिताविहीन भएका छन् ।
भारतको एक हजारौं एकदिवसिय खेलमा रोहित शर्माले टोलीको नेतृत्व गरेका थिए ।
त्यस्तै, १००औं खेल खेल्दा भारतको कप्तानी कपिल देवले सम्हालेका थिए भने ५००औं एकदिवसिय खेलमा सौरभ गाङ्गुली भारतको कप्तान रहेका थिए ।
भारत एक हजार एकदिवसिय खेलको कीर्तिमानसहित सबैभन्दा धेरै खेल खेल्ने राष्ट्रको शीर्ष स्थानमा रहँदा अस्ट्रेलिया नौ सय ५८ खेलसहित दोस्रो र नौ सय ३६ खेलसहित पाकिस्तान तेस्रो स्थानमा छ ।
