नगरकोटमा हिँउ परेसँगै मनोरम दृश्य अवलोकन गर्न र रमाउन मानिसको भीड लागेको छ ।
काठमाडौँबाट २७ किलोमिटरमा रहेको नगरकोट सूर्योदय र सूर्यास्त हेर्नका लागि नेपालको चर्चित ठाउँ हो ।
तर बिहिबारदेखि नेपाल भित्रिएको पश्चिमी न्यून चापीय प्रणालीका कारण नेपालका अधिकाशं पहाडी तथा हिमाली भेगमा हिमपात भएसँगै नगरकोटमा उदाउँदो र अस्ताउँदो सूर्य हेर्नभन्दा पनि हिँउसँग रमाउनेको सङ्ख्या बाक्लिएको हो ।
भक्तपुर जिल्लामा रहेको नगरकोट काठमाडौँ जिल्लाबाट सबैभन्दा धेरै हिमशृङ्खला देखिनेमध्येको सबैभन्दा परिचित ठाउँ हो ।
समुद्री सतहबाट सात हजार एक सय ३६ फिट उचाइमा रहेको नगरकोटबाट नेपालका १३मध्ये आठ हिमशृङ्खला देख्न सकिन्छ ।
सयौंको सङ्ख्यामा हिँउ खेल्न नगरकोट पुगेपछि सवारी साधनको भीड बढेको थियो । फर्किने र जाने सवारीसाधनको सङ्ख्या अत्यधिक हुँदा राजमार्गका विभिन्न ठाउँमा सवारी जाम भएको थियो ।
बिहिबार, शुक्रबार र शनिबार देशभर सक्रिय भएको पश्चिमी न्यून चापीय प्रणालीमा आजबाट भने केही सुधार हुने मौसम पूर्वानुमान महाशाखाले जनाएको छ ।
हेर्नुहाेस् तस्बिरहरूः
