फेरि पनि नेपाल आयल निगमले पेट्रोलियम पदार्थको मूल्य बढाएको छ । योसँगै पेट्रोलको मूल्यले उच्च विन्दुमा नयाँ रेकर्ड कायम गरेको छ ।
मङ्गलबार विज्ञप्ति जारी गर्दै निगमले पेट्रोल, डिजल र मट्टितेलको भाउ प्रतिलिटर ती–तीन रुपैयाँ दरले बढाएको हो ।
अब पेट्रोल एक सय ४२ र डिजेल/मटितेलको मूल्य प्रतिलिटर एक सय २५ रुपैयाँ कायम भएको छ ।
यसअघि २०७० साल फागुन ३० गते भएको समायोजनअनुसर पेट्रोलको मूल्य प्रतिलिटर १४० रुपैयाँसम्म पुगेको थियो ।
अन्तर्राष्ट्रिय बजारमा इन्धनको मूल्य बढेकाले पेट्रोलियम पदार्थको मूल्य बढाएको निगमको दाबी छ ।
बढेको मूल्य बुधबार राति १२ बजेबाट लागू हुने निगमले जनाएको छ।
त्यसैगरी, हवाई इन्धनमा आन्तरिकतर्फ प्रतिलिटर १० रुपैयाँ र अन्तर्राष्ट्रियतर्फ प्रति किलोलिटर एक सय डलर बढाएको छ ।
गत माघ ५ गते पनि मूल्य बढाएको निगमले १३ दिनमा फेरि मूल्य बढाएको हो।
भाउ बढाउँदा पनि निगमलाई १५ दिनमा दुई अर्ब २३ करोड रुपैयाँ घाटा रहेको नेपाल आयल निगमका सह–प्रवक्ता पुस्कर कार्कीले बताए ।
एलपी ग्यासको नयाँ खरिद मूल्य प्रति सिलिण्डर ८१. ६२ रूपैयाँले घटेर आएको थियो ।
तर पनि निगमलाई प्रतिसिलिण्डर ५६०.०९ रूपैयाँ घाटा रहेको हुँदा समेत बिक्री मूल्य नबढाई यथावत नै राखिएको निगमले जनाएको छ ।
यो समायोजनपछि निगमको १५ दिनको घाटा ३७ करोडले घटेर करीब २ अर्ब २३ करोड रूपैयाँ घाटा कायम हुन निगमले जानकारी दिएको छ ।
यस्तो छ निगमको विज्ञप्ति :