पेटमा एसिडको मात्रा बढी हुन गएमा ग्यास्ट्रिक हुन्छ ।
दुब्लाउनका लागि गरिएको डाइटिङ, धर्मकर्मको नाममा राखिएको ब्रत, चिल्लो तथा पिरो खाने गर्नाले ग्यास्ट्रिक हुन्छ ।
त्यसबाहेक अव्यवस्थित समयमा खाने, घरमा बनेको भन्दा बाहिरको जङ्क फुडहरू धेरै खाने कारण ग्यास्ट्रिक हुन्छ ।
खानपान तथा खाने समयमा ध्यान नदिने, शारीरिक श्रम कम गर्ने, अस्वस्थ जीवनशैली, अल्छिपना नै ग्यास्ट्रिकको मुख्य कारण बनेको हुन्छ ।
ग्यास्ट्रिक भएकाहरूलाई सामान्यत पेट दुख्ने, पेट तथा छाती पोल्ने गरेको देखिन्छ ।
ग्यास्ट्रिक बढ्दै गएमा वाकवाकी लाग्ने, वान्ता हुने, ढ्याउ आउने, भोक हराउने, खाना नपच्ने, वान्तामा रगत देखिने हुन्छ ।
यस्तै, कालो दिसा आउने, तौल कम हुने, छाती र पेटको बीचको भाग पोल्ने, दुख्ने, अम्लपित बढ्ने हुन्छ ।
यसैगरी, ग्यास्ट्रिक बढेमा मुख बिग्रिने, पेट भारी हुने, वायु बढ्ने आदि लक्षण देखा पर्न थाल्छ ।
ग्यास्ट्रिकलाई मानिसले सामान्य तरिकाले लिने गर्छन् ।
तर यसले स्वास्थ्यमा दीर्घकालीन रूपले असर पुर्याइरहेको हुन्छ ।
ग्यास्ट्रिकबाट बच्नका लागि खानपान, खाने समय र ब्यायाममा विशेष ध्यान पुर्याउनु पर्छ ।
दैनिक हरियो सागसब्जी, मौसमअनुसारको फलफूल र नरम फाइबर भएको खानेकुरा प्रशस्त मात्रामा सेवन गर्नाले ग्यास्ट्रिकबाट बच्न सकिन्छ ।
सकभर पेटलाई खाली राख्न हुँदैन ।
पेटलाई खाली नराखी हरेक दुई-तीन घण्टामा केही न केही स्वस्थ खानेकुरा खाइराख्नु पर्छ ।
दैनिक पानी पनि प्रशस्त मात्रामा पिउने गर्नु पर्छ ।
बिहान उठ्नेबित्तिकै मनतातो पानी पिउने बानीले ग्यास्ट्रिक हुने सम्भावना कम गर्न सक्छ ।
उठ्नेबित्तिकै जुसको सेवन गर्दा पेटमा ग्यास भरिन सक्ने हुनाले जुसभन्दा पनि पानी पिउने बानी बसाल्नु पर्छ ।
बरु, कागती पानीको सेवन गर्न सकिन्छ ।
यसले ग्यास्ट्रिक हटाउनुका साथै तौल नियन्त्रण गर्न पनि सहयोग गर्ने गर्छ ।
ग्यास्ट्रिकबाट बच्नका लागि बढी चिल्लो, अमिलो र पिरो खानेकुराको त्याग गर्नु पर्छ ।
जङ्कफुड त्याग्नु ग्यास्ट्रिकका लागि मात्र नभएर अन्य स्वास्थ्य समस्याको लागि पनि राम्रो हुन्छ ।
यस्ता खाद्य पदार्थको नियमित प्रयोगले पाचन प्रक्रियामा समस्या सिर्जना हुन गइ ग्यास्ट्रिक बढेर जान्छ ।
व्यस्तता, मानसिक तनाव, भय, चिन्ता, शोक, अनिद्राले पनि ग्यास्ट्रिक बढाउन सक्ने हुनाले यस्तो कुरामा सचेत रहनु आवश्यक देखिन्छ ।
ग्यास्ट्रिकले सताएको छ भने चिया–कफी, धूम्रपान, मध्यपान र सुर्तीजन्य पदार्थको सेवन गर्नु हुँदैन ।
दुखाइ कम गर्ने, प्रेसर कम गर्ने र बाथरोगको औषधिबाट समेत ग्यास्ट्रिक हुने सम्भावना हुन्छ ।
यसैले डाक्टरको सल्लाहबिना कुनै पनि प्रकारको औषधिको सेवन गर्नु हुँदैन ।
