राष्ट्रियसभा सदस्यमा निर्वाचित १९ जनाको निर्वाचन आयोगले नामावली सार्वजनिक गरेको छ ।
बुधबार १९ पदका लागि भएको राष्ट्रियसभा निर्वाचनमा महिला, दलित, अपाङ्गता भएका व्यक्ति वा अल्पसङ्ख्यक र अन्य समूह गरी ४३ उम्मेदवार सहभागी भएका थिए ।
निर्वाचनमा सम्बन्धित प्रदेशभित्रका प्रदेशसभा सदस्य तथा स्थानीय तहका प्रमुख र उपप्रमुख मतदाता थिए । प्रदेशसभा सदस्यको मतभार ४८ र स्थानीय तहका जनप्रतिनिधिको मतभार १८ रहेको थियो ।
निर्वाचन आयोगले बुधबार राति सार्वजनिक गरेको नतिजाअनुसार प्रदेश १ मा गोपाल कुमार बस्नेत, सोनाम गेल्जेन शेर्पा, जयन्ती देवी राई निर्वाचित भए ।
यस्तै, मधेस प्रदेशमा उर्मिला अर्याल, मोहम्मद खालिद निर्वाचित भए ।
वाग्मतीमा गोमादेवी तिमिल्सना, कृष्णप्रसाद पौडेलले जित्दा गण्डकीमा कमला पन्त, भुवनबहादुर सुनार, सुरेश आलेमगर विजयी भए ।
लुम्बिनीमा राजेन्द्रलक्ष्मी गैरे, तुलप्रसाद विश्वकर्मा, युवराज शर्मा विजयी हुँदा कर्णालीमा दुर्गा गुरुङ, नरबहादुर विष्ट, उदयबहादुर बोहरा निर्वाचित भए ।
यसैगरी, सुदूरपश्चिममा मदन कुमारी शाह, जगद बहादुर पार्की र नारायणदत्त मिश्र विजयी भए ।
निर्वाचनको लागि प्रदेश १ मा ३६४, मधेश प्रदेशमा ३७२, वाग्मती प्रदेशमा ३४६, गण्डकी प्रदेशमा २२९, कर्णाली प्रदेशमा १९१, लुम्बिी प्रदेशमा २९६ र सुदूरपश्चिम प्रदेशमा २२७ गरी सातै प्रदेशमा कुल २०२५ मतदाता थिए ।
जसमध्ये दुई हजार सात जनाले राष्ट्रियसभा निर्वाचनमा मतदान गरे भने १८ जना मतदाता अनुपस्थित थिए ।
