प्रदेश २ को सोमबार बसेको प्रदेशसभाको बैठकले प्रदेश २ को नाम ‘मधेस’ बहुमतले पारित गरेको छ ।
प्रदेश २ को नाम मधेस प्रदेश राख्नु पर्ने प्रस्तावको पक्षमा ८० मत प्राप्त भएपछि मधेश प्रदेश बहुमतले पारित भएको हाे ।
आजको बैठकमा प्रदेशसभा सदस्यहरू शैलेन्द्र साह, शैलेन्द्र यादव र भरतप्रसाद साहले प्रदेशको नाम मधेस प्रदेश हुनुपर्ने प्रस्ताव गरेपछि भएको मतदानमा मधेश प्रदेशको पक्षमा ८० र विपक्षमा १९ मत परेको थियो ।
त्यसैगरी, सोमबारै प्रदेश २ को राजधानी ‘जनकपुरधाम’ पनि बहुमतले पारित भएको छ ।
प्रदेशसभामा प्रतिनिधित्व गर्ने दलहरूको तर्फबाट प्रदेशसभा सदस्य परमेश्वर साहले राजधानी जनकपुरधाम राख्न गरेको प्रस्ताव माथि भएको मतदानमा राजधानी जनकपुरको पक्षमा ७८ मत परेपछि दुइतिहाई बहुमतले राजधानी जनकपुरधाम कायम गरिएको हो ।
उक्त प्रस्तावको विपक्षमा २१ मत परेको थियो । राजधानी जनकपुरधाम हुनुपर्ने प्रस्तावमाथि प्रदेशसभामा उपस्थित ९९ जना प्रदेशसभा सदस्यले भाग लिएक थिए ।
