नयाँ संस्करणको इन्डियन प्रिमियर लिग (आइपिएल) टी-२० क्रिकेटको अक्सनका लागि नेपालका १५ खेलाडीले नाम दर्ता गराएका छन् ।
आइपिएल २०२२ को प्लेअर अक्सनका लागि कुल एक हजार दुई सय १४ खेलाडीले नाम दर्ता गराएका छन् भने त्यसमा नेपालबाट १५ खेलाडीको नाम रहेकाे बिसिसिआईले जनाएको छ ।
नेपाल क्रिकेट सङ्घ (क्यान) का आइपिएलका लागि नेपालबाट कप्तान सन्दीप लामिछानेसहित आसिफ शेख, पवन सरार्फ, सन्दीप जोरा, कुशल भुर्तेल, रोहित कुमार पौडेल, सुशान भारी, आरिफ शेख, अभिनाश बोहरा, विनोद भण्डारी, शरद भेषावकर, कुशल मल्ल, करण केसी, सोमपाल कामी र दीपेन्द्रसिंह ऐरीले नाम दर्ता गराएका छन् ।
अहिलेसम्म नेपालबाट कप्तान सन्दीपले मात्र आइपिएल खेलेका छन् ।
नयाँ सिजनको लागि आइपिएल खेल्न विश्वभरबाट एक हजार दुई सय १४ खेलाडीले नाम दर्ता गराएका छन् । जसमा आठ सय ९६ जना भारतीय र तीन सय १८ जना विदेशी खेलाडी छन् ।
आइपिएलको अक्सन फ्रेब्रुअरी १२ र १३ तारिख बैँगलोरमा हुनेछ । आइपिएलमा यसपटक १० टोलीको सहभागिता रहनेछ । आइपिएलको औपचारिक घोषणा भने हुने बाँकी छ ।
खेलाडी दर्ताका लागि २० जनवरीसम्मको समयसिमा तोकिएको थियो । जसमा भारतीय आठ सय ९६ र विदेशी तीन सय १८ खेलाडीले नाम दर्ता गराएका हुन् ।
एसोसिएट राष्ट्रबाट कुल ४१ खेलाडीले नाम दर्ता गराउँदा नेपालबाट १५ खेलाडीले दर्ता गरेको हो । नेपालपछि अमेरिकाका १४ खेलाडीले नाम दर्ता गरेका छन् ।
आइपिएलमा हरेक टिमले बढीमा २५ जनासम्म टिममा राख्न पाउनेछन् । अक्सनबाट बढीमा दुई सय १७ खेलाडीमात्र छनाेट हुने बिसिसिआईले विज्ञप्तिमार्फत जनाएको छ ।
