शिक्षा, विज्ञान तथा प्रविधि मन्त्रालयले विद्यार्थीबाट विराटनगरस्थित नोबेल मेडिकल कलेज र काठमाडौँ मेडिकल कलेज (केएमसी)लाई कारबाही गर्न गृह मन्त्रालयलाई सिफारिस गरेको छ ।
शिक्षामन्त्री देवेन्द्र पौडेलले अतिरिक्त शुल्क लिने नोबेल र केएमसी मेडिकल कलेजमाथि कारबाही गर्न गृहमन्त्री बालकृष्ण खाँणसमक्ष आग्रह गरेका हुन् ।
मन्त्री पाैडेलले शिक्षा मन्त्रालयको निर्णय र निर्देशन उल्लङ्घन गरेकाले ती दुवै अस्पताललाई गृह प्रशासनमार्फत कारबाही अघि बढाउन आग्रह गरेका हुन् ।
शुक्रबार गृह मन्त्रालयले पीडित विद्यार्थी, सात विद्यार्थी सङ्गठनको प्रतिनिधि र शिक्षामन्त्रीसहित छलफल गरेको थियो । छलफलका क्रममा शिक्षामन्त्री पौडेलले निर्णय र निर्देशन उल्लङ्घन गर्ने कलेजलाई स्थानीय प्रशासनमार्फत कारबाही गर्नुको विकल्प नरहेको औँल्याएका थिए ।
यी दुई मेडिकल कलेजका विद्यार्थी मङ्सिर १९ गतेदेखि आन्दोलनमा छन् । विद्यार्थीले अतिरिक्त शुल्क मागेको विषयमा काठमाडौं, भक्तपुर र मोरङ प्रशासनमा प्रमाणसहित उजुरी दिइसकेको छन् ।
केएमसी र नोबेल मेडिकल कलेजका सञ्चालक सुनील शर्मा काङ्ग्रेस मोरङका नेतासमेत रहेकोले कांग्रेस नेतृत्वको सरकार कारबाही गर्न पछि हटेको पीडित विद्यार्थी र अभिभावकको गुनासो छ ।
