सरकारले सपिङ मल, डिपार्टमेन्ट स्टोर, सुपर मार्केट वा अन्य प्रकारका पसलमा २५ जनाभन्दा बढी भेला हुन नपाउने निर्णय गरेको छ ।
आइतबार बसेको मन्त्रिपरिषद् बैठकले कोरोना भाइरस सङ्क्रमण बढ्दै गएपछि र ओमिक्रोनको जोखिम बढेसँगै सपिङ मल, डिपार्टमेन्ट स्टोर, सुपर मार्केट वा अन्य प्रकारका पसलमा एक पटकमा पच्चीस जना भन्दा बढी हुन नपाउने निर्णय गरेको हो ।
साथै, यस्ता पसलमा जाँदा कुनै पनि सामान अनावश्यक रूपमा छुन नहुने जनाइएको छ ।
बैठकले गरेको निर्णयअनुसार दुई व्यक्तिको बीचमा कम्तीमा दुई मिटर दुरी कायम गर्ने, मास्क अनिवार्य गर्ने, पटक-पटक साबुन पानीले हात धुने वा सेनिटाइज गर्ने गरी मात्र यस्ता पसल सञ्चालन गर्न पाइने छ ।
जनस्वास्थ्यसम्बन्धी मापदण्ड पालना गर्ने तथा गराउने दायित्व सम्बन्धित व्यवस्थापक वा सञ्चालकको हुने जनाइएको छ ।
