स्पेनिस सुपर कपको फाइनलमा रियल मड्रिड र एथ्लेटिक क्लब बिल्बाओ भिड्ने भएका छन् ।
बिहीबार राति भएको दोस्रो सेमिफाइनल खेलमा एथ्लेटिको मड्रिडमाथि जित निकाल्दै बिल्बाओ फाइनलमा पुगेको हो ।
साउदी अरबमा भएको खेलमा बिल्बाओले स्पेनिस च्याम्पियन एथ्लेटिकोलाई २–१ गोलले हरायो ।
एथ्लेटिकोले बनाएको सुरुआती अग्रता उल्टाउँदै बिल्बाओले जित निकाल्यो ।
खेलको पहिलो हाफ गोलरहित बराबरीमा सकिएको थियो ।
६२औँ मिनेटमा बिल्बाओका युनाई सिमोनले आत्मघाती गोल गरेपछि एथ्लेटिकोले सुरुआती अग्रता बनायो ।
एरी अल्भारेजले ७७औँ मिनेटमा गोल गर्दै बिल्बाओलाई बराबरीमा फर्काए ।
८१औँ मिनेटमा विलियम्सले गोल गर्दै बिल्बाओलाई अग्रता दिलाए ।
खेलको इन्ज्युरी समयमा जोसे मारिया जिमिनेजले रातो कार्ड पाएपछि एथ्लेटिको १० खेलाडीमा समेटियो ।
र, थप गोल हुन नसकेपछि बिल्बाओले रियल मड्रिडसँगको भेट पक्का गरेको हो ।
रियल बुधबार राति भएको पहिलो सेमिफाइनल खेलमा बार्सिलोनालाई ३–२ गोलले हराउँदै फाइनलमा पुगेको छ ।
फाइनल खेल १६ जनवरीमा हुनेछ ।
