घरेलु टोली न्युजिल्यान्डले बङ्गलादेशविरुद्धको दोस्रो टेस्ट एक इनिङ्स र १ सय १७ रनले जितेको छ । सानदार जितसँगै न्युजिल्यान्डले दुई खेलको टेस्ट सिरिज १–१ को बराबरीमा टुङ्ग्याएको छ ।
यसअघि पहिलो टेस्ट बङ्गलादेशले ८ विकेटले जितेको थियो । दोस्रो टेस्टमा भने न्यूजिल्यान्डले सानदार जित दर्ता गरेको हो ।
पहिले ब्याटिङ गरेको न्यूजिल्यान्डले ६ विकेटको क्षतिमा पाँच सय २१ रनमा पहिलो इनिङ्स समाप्तीको घोषणा गरेपछि बङ्गलादेशको ब्याटिङ चल्न सकेन ।
बङ्गलादेश पहिलो इनिङ्समा एक सय २६ रनमै अलआउट भएपछि तीन सय ९६ रनले पछि परेको थियो । जसका कारण बङ्गलादेश फलोअनमा परेको थियो र पुन ब्याटिङमा उत्रिएको थियो ।
तर दोस्रो इनिङ्समा बङ्गलादेशले सुधारिएको प्रदर्शन गरेपनि उसले २ सय ७८ रनमा सबै विकेट गुमाएको थियो ।
दोस्रो इनिङ्समा बङ्गलादेशका लागि लिटन दासले १ सय २ रन जोडे ।
बङ्गलादेशलाई अलआउट गर्न न्यूजिल्यान्डका कायल जेमिसनले सर्वाधिक चार विकेट लसए भने नेल वाग्नले तीन विकेट हात पारे ।
बङ्गलादेशका लागि पहिलो इनिङ्समा यासिर अलीले सर्वाधिक ५५ रनको योगदान गरेका थिए ।
न्युजिल्यान्डका ट्रेन्ट बोल्टले भने सर्वाधिक पाँच विकेट लिएका थिए ।
यसअघि कप्तान टम लाथमले २ सय ५२ तथा डेभोन कनवेले १ सय ९ रन जोडेपछि न्यूजिल्यान्डले विशाल योगफल तयार पारेको थियो ।
